Saif Ali Khan : सैफ अली खानला मोठा झटका – 15 हजार कोटींच्या मालमत्तेवर ‘शत्रू मालमत्ते’चा शिक्का

बॉलीवूडमधील प्रसिद्ध अभिनेता सैफ अली खान यांच्यासाठी नुकताच मोठा धक्का बसला आहे. पाटौदी घराण्याशी संबंधित अंदाजे 15000 कोटी रुपयांच्या ऐतिहासिक मालमत्तेवर त्यांचा हक्क संपुष्टात आला आहे. मध्य प्रदेश उच्च न्यायालयाने या मालमत्तेला 'शत्रू मालमत्ता' असा दर्जा दिला असून, 1999 मध्ये त्यांच्या पणजी सजिदा सुलतान यांच्या बाजूने दिलेला निर्णय रद्द केला आहे.

‘शत्रू मालमत्ता कायदा’ (Enemy Property Act) नुसार, फाळणीनंतर पाकिस्तानात गेलेल्या किंवा तिथले नागरिकत्व स्वीकारलेल्या व्यक्तींच्या मालकीची संपत्ती भारत सरकारच्या ताब्यात येते. सजिदा सुलतान यांचा भाऊ पाकिस्तानात स्थायिक झाल्यामुळे, त्याच्याशी संबंधित मालमत्ता शत्रू मालमत्तेत समाविष्ट करण्यात आली आहे.

दरम्यान, सैफ अली खान यांचं वडिलोपार्जित पाटौदी पॅलेसही चर्चेत राहिलं आहे. काही वर्षांपूर्वी त्यांनी हे पॅलेस एका हॉटेल साखळीकडून परत खरेदी केल्याच्या चर्चा होत्या, मात्र त्यांनीच त्या अफवांना फेटाळून लावत स्पष्ट केलं होतं की, हे पॅलेस त्यांच्याच मालकीचं आहे आणि केवळ काही काळासाठी 'नीमराणा हॉटेल्स' संस्थेला भाड्याने देण्यात आलं होतं.

2011 मध्ये वडील मन्सूर अली खान पाटौदी यांच्या निधनानंतर कुटुंबाने पुन्हा पॅलेस स्वतःच्या ताब्यात घेतलं. सैफ यांच्या म्हणण्यानुसार, हे ठिकाण केवळ ऐतिहासिक नाही, तर भावनिकदृष्ट्याही अतिशय महत्त्वाचं आहे. “या पॅलेसला पैसे मोजून किंमत लावता येणार नाही,” असं ते म्हणाले होते. “माझे आजी, आजोबा आणि वडील यांचं अंतिम स्थान याच ठिकाणी आहे. इथे मला मानसिक शांतता आणि एक वेगळं आध्यात्मिक नातं जाणवतं.”

ते पुढे म्हणाले, “जरी ही जमीन कित्येक शतकांपासून आमच्या कुटुंबाच्या मालकीची असली, तरी पॅलेसचं बांधकाम माझ्या आजोबांनी त्यांच्या पत्नीसाठी शंभर वर्षांपूर्वी केलं होतं. त्या काळी ते शासक होते, पण नंतर शाही पदव्या आणि 'प्रिव्ही पर्स' रद्द करण्यात आल्यानंतर वडिलांनी हे पॅलेस भाड्याने दिलं. हॉटेल व्यवस्थापन करणारे फ्रान्सिस वाच्झियर्ग आणि अमन नाथ यांनी या ठिकाणी आपुलकीने काळजी घेतली आणि आमच्या कुटुंबाचा भागच बनले. माझी आई शर्मिला टागोर यांच्यासाठीही इथे एक स्वतंत्र कॉटेज आहे आणि ती नेहमीच इथे समाधानी असते.”