Winter Health: हिवाळ्यात स्वेटर घालून झोपणे होऊ शकते हानिकारक, जाणून घ्या कारण

हिवाळ्यातील कडाक्याच्या थंडीमुळे मुंबईसह सर्वच शहरांत लोक दिवसभर स्वेटर घालून फिरत आहेत. रात्री थंडीपासून वाचण्यासाठी आणि उबदारपणा मिळावा यासाठी अनेकजण स्वेटर किंवा जाड कपडे घालूनच झोप घेतात. ही सवय आरामदायक वाटली तरी आरोग्य तज्ज्ञांनी याबाबत इशारा दिला आहे. स्वेटर घालून झोपण्याने शरीरावर आणि झोपेच्या गुणवत्तेवर नकारात्मक परिणाम होऊ शकतात, असा इशारा तज्ज्ञांनी दिला आहे.

आरोग्य तज्ज्ञांच्या मते, झोपताना मानवी शरीराचे तापमान नैसर्गिकरित्या कमी होते. ही घट शरीराला आराम देण्यास मदत करते आणि गाढ झोप घेण्यास उपयुक्त ठरते. मात्र स्वेटर किंवा जास्त गरम कपडे घालून झोपल्याने ही प्रक्रिया विस्कळीत होते. शरीर जास्त गरम होऊन रात्री अस्वस्थता जाणवते. चांगल्या झोपेसाठी खोलीचे तापमान १८ ते २१ डिग्री सेल्सिअस असावे, पण जास्त उबदार कपड्यांमुळे रात्री वारंवार जाग येणे, घाम येणे आणि अस्वस्थ वाटणे यासारख्या समस्या उद्भवतात. यामुळे दुसऱ्या दिवशी सकाळी थकवा आणि आळस जाणवतो.

स्वेटरमुळे जास्त घाम येणे आणि डिहायड्रेशन ही आणखी एक गंभीर समस्या आहे. शरीर स्वतःला थंड करण्यासाठी घाम सोडते, ज्यामुळे रात्री तहान लागणे किंवा सकाळी कोरडे तोंड, डोकेदुखी आणि अशक्तपणा जाणवू शकतो. तसेच, घाम त्वचेवर साचल्याने पुरळ, खाज आणि लालसरपणा यासारख्या त्वचेच्या समस्या वाढू शकतात, विशेषतः संवेदनशील त्वचेच्या व्यक्तींमध्ये. तज्ज्ञ सांगतात की, झोपताना हलके, श्वास घेण्यायोग्य मोकळे कपडे घालावेत. थंडी वाटत असल्यास स्वेटरऐवजी हलके ब्लँकेट वापरावे.

हिवाळ्यात आरोग्याची काळजी घेण्यासाठी तज्ज्ञांनी हलक्या कपड्यांचा आणि योग्य खोलीच्या तापमानाचा सल्ला दिला आहे. ही साधी सवय बदलून तुम्ही गाढ झोप आणि निरोगी शरीर मिळवू शकता.