Mumbai Crime: बदलापूर अत्याचाराची मालाडमध्ये पुनरावृत्ती, शाळेतील शिपायाकडून 5 वर्षांच्या चिमुकलीवर गैरवर्तन

थोडक्यात बातमी वाचण्यासाठी खाली स्क्रोल करा...

बदलापूर येथील धक्कादायक घटनेची आठवण करून देणारा प्रकार मालाड परिसरात समोर आला आहे. मालाडमधील एका शाळेत पाच वर्षांच्या चिमुकलीसोबत शाळेतील शिपायाने गैरवर्तन केल्याचा गंभीर आरोप करण्यात आला असून, या घटनेमुळे परिसरात तीव्र संताप व्यक्त केला जात आहे.

मिळालेल्या माहितीनुसार, आरोपी शिपायाने अल्पवयीन मुलीला जीवे मारण्याची धमकी देत तिच्याशी गैरकृत्य केले. हा प्रकार उघडकीस आल्यानंतर मुलीच्या पालकांनी तत्काळ शाळा प्रशासनाकडे तक्रार केली. मात्र, आरोपीबाबत स्पष्ट माहिती देण्यास शाळा प्रशासनाने टाळाटाळ केल्याचा आरोप पालकांनी केला आहे.

इतकेच नव्हे तर, शाळेची बदनामी होऊ नये या हेतूने शाळेच्या सीईओंनी प्रकरण बाहेर जाऊ नये म्हणून मुलीच्या पालकांवर दमदाटी केल्याचा आरोपही करण्यात आला आहे. या प्रकारामुळे पालकांमध्ये तसेच स्थानिक नागरिकांमध्ये तीव्र संतापाची भावना आहे.

मुलीच्या पालकांनी दिलेल्या तक्रारीनंतर मालाड पोलिसांनी शाळेचा शिपाई अनिल पांचाळ (वय ३०) आणि शाळेचे सीईओ अनंत यज्ञीक (वय ६५) यांच्याविरोधात गुन्हा दाखल केला आहे. दोघांविरोधात भारतीय न्याय संहिता 2023 अंतर्गत कलम 74, 351(2)तसेच बालकांचे लैंगिक अपराधांपासून संरक्षण अधिनियम (POCSO) 2012 मधील कलम 10, 17 आणि 21(2) अन्वये गुन्हा नोंदवण्यात आला आहे.