Vasai-Virar Mahapalika: भाजपला धक्का! वसई-विरार महापौर निवडणुकीत अजीव पाटील विजयी; बविआचा झेंडा फडकला

थोडक्यात बातमी वाचण्यासाठी खाली स्क्रोल करा...

वसई-विरार महानगरपालिकेच्या महापौर आणि उपमहापौर निवडीसाठी आज आयोजित विशेष सभेत अपेक्षेप्रमाणे बहुजन विकास आघाडीने (बविआ) बाजी मारली आहे. महापौरपदासाठी बविआचे उमेदवार अजीव यशवंत पाटील यांची बहुमताने निवड झाली. विजय घोषित होताच सभागृहात बविआच्या 'शिट्टी' चिन्हाचा जयघोष आणि शिट्ट्यांचा आवाज गुंजला.

महापौरपदासाठी रिंगणात अनेक उमेदवार उतरले होते, मात्र मुख्य लढत बविआ आणि भाजपमध्ये झाली. बविआकडून अजीव यशवंत पाटील, प्रफुल्ल साने आणि निशाद चोरघे यांनी अर्ज दाखल केले होते. त्यांच्या विरोधात भाजपच्या अ‍ॅड. दर्शना त्रिपाठी-कोटक रिंगणात होत्या. विशेष सभेची सुरुवात नामनिर्देशनपत्रांच्या छाननीने झाली, त्यानंतर उमेदवारी अर्ज मागे घेण्याची मुदत देण्यात आली. शेवटी झालेल्या मतदानात बविआने भाजपला मागे टाकले.

उपमहापौरपदासाठीही बविआकडून मार्शल डॉमनिक लोपीस आणि कन्हैया भोईर यांनी उमेदवारी अर्ज दाखल केले होते. भाजपच्या वतीने नारायण मांजरेकर आणि नशीब आजमावत रिंगणात होते. मतदानात बविआचे मार्शल लोपीस यांची विजय निश्चित झाला. या दुहेरी यशाने बविआ कार्यकर्ते आनंदित झाले असून, पालिकेच्या मुख्यालयाबाहेर गुलाल उधळत जल्लोष केला गेला.

हितेंद्र ठाकूर यांच्या नेतृत्वाखालील बविआने महापौर अजीव पाटील आणि उपमहापौर मार्शल लोपीस यांच्या रूपाने विविध समाजांना प्रतिनिधित्व देऊन सामाजिक सलोखा आणि सर्वसमावेशकता जपली आहे. या निवडीमुळे आगामी निवडणुकांसाठी पक्षाची पकड मजबूत झाल्याचे मानले जात आहे. भाजपला पराभवाचा सामना करावा लागला असला तरी बविआचे वर्चस्व कायम राहिले आहे.