Vaishno Devi Landslide : जम्मू-कश्मीरमध्ये वैष्णोदेवी यात्रामार्गावर भूस्खलन, 31 जणांचा मृत्यू तर अनेक लोक ढिगाऱ्याखाली
जम्मू-कश्मीरमधील कटरा येथे अरधकुमारी परिसरात माता वैष्णोदेवी यात्रामार्गावर झालेल्या भूस्खलनात किमान 31 जणांचा मृत्यू झाला असून 23 जण जखमी झाले आहेत. बुधवारी मुसळधार पावसानंतर ही दुर्घटना घडली. एनडीआरएफ, एसडीआरएफ, पोलीस आणि सेना यांचे पथक शोध व मदतकार्यात गुंतले असून अजूनही काही यात्रेकरू ढिगाऱ्याखाली अडकले असण्याची भीती व्यक्त केली जात आहे.
सतत सुरू असलेल्या पावसामुळे जम्मू-काश्मीरमध्ये पूर आणि भूस्खलनाचे अनेक प्रकार घडले आहेत. जम्मू जिल्ह्यातील अनेक पूल वाहून गेले असून वीजवाहिन्या व मोबाईल टॉवर्सचे मोठ्या प्रमाणावर नुकसान झाले आहे. सलग पावसामुळे जिल्ह्यातील 3500 हून अधिक नागरिकांना सुरक्षित स्थळी हलविण्यात आले आहे.
हवामान खात्याच्या माहितीनुसार, जम्मूमध्ये मंगळवारी केवळ सहा तासांत 22 सेंमी पावसाची नोंद झाली, जी विक्रमी ठरली. याआधी मंगळवारीच यात्रामार्गावर झालेल्या आणखी एका भूस्खलनात नऊ जणांचा मृत्यू झाला होता, तर 21 जण जखमी झाले होते. दक्षिण काश्मीरमध्ये झेलम नदीच्या पाणीपातळीने धोक्याची पातळी ओलांडल्याने पुराचा इशाराही देण्यात आला आहे.
परिस्थितीचा परिणाम शाळा, वाहतूक आणि दळणवळण व्यवस्थेवरही झाला आहे. जम्मू विभागातील सर्व शाळा 27 ऑगस्टपर्यंत बंद ठेवण्याचे आदेश देण्यात आले असून दहावी व अकरावीच्या परीक्षा पुढे ढकलण्यात आल्या आहेत. लेहकडे जाणारी अनेक विमानं उशिराने धावली किंवा रद्द करण्यात आली आहेत, तर जम्मू विभागातील 20 हून अधिक गाड्या रद्द अथवा मार्ग कमी करण्यात आल्या आहेत. दरम्यान, टेलिकॉम सेवा कोसळल्याने लाखो नागरिकांचा संपर्क तुटला आहे.
हवामान तज्ञांच्या मते, डोंगराळ व पायथ्याच्या भागात पुढील काही दिवस पावसाचा जोर कायम राहण्याची शक्यता आहे. त्यामुळे परिस्थिती आणखी गंभीर होऊ नये म्हणून प्रशासनाने नागरिकांना सतर्क राहण्याचे आणि बचाव पथकांना सहकार्य करण्याचे आवाहन केले आहे.
