Ajit Pawar : भाजपच्या बालेकिल्ल्यात अजित पवारांचा तुफान रोड शो; कोथरूडमध्ये राजकीय खळबळ
राज्यातील राजकारण तापले असतानाच उपमुख्यमंत्री अजित पवार यांनी भाजपचा बालेकिल्ला मानल्या जाणाऱ्या कोथरूड मतदारसंघात जोरदार शक्तिप्रदर्शन करत राजकीय समीकरणे बदलण्याचे संकेत दिले आहेत. भाजपचे ज्येष्ठ नेते आणि मंत्री चंद्रकांत पाटील यांच्या मतदारसंघात अजित पवार यांनी केलेल्या तुफान रोड शोमुळे पुण्याच्या राजकारणात मोठी खळबळ उडाली आहे.
काल रात्री उशिरा अजित पवार यांनी कोथरूड आणि बावधन परिसरातून रोड शो काढत आपल्या उमेदवारासाठी प्रचार केला. रस्त्याच्या दुतर्फा जमलेली गर्दी, कार्यकर्त्यांचा उत्साह आणि जोरदार घोषणाबाजीमुळे संपूर्ण परिसर राष्ट्रवादी काँग्रेसच्या रंगात रंगलेला दिसत होता. अजित पवारांचा हा रोड शो केवळ प्रचारापुरता मर्यादित न राहता, भाजपला थेट आव्हान देणारा राजकीय संदेश मानला जात आहे.
कोथरूड हा मतदारसंघ गेल्या अनेक वर्षांपासून भाजपचा मजबूत गड मानला जातो. चंद्रकांत पाटील यांचे हे पारंपरिक मतदारसंघ असून, भाजपची संघटनात्मक ताकद येथे मोठी आहे. मात्र, यंदा अजित पवार गटाने कोथरूड आणि बावधन भागात तगडे उमेदवार उभे करून भाजपसमोर कडवी लढत उभी केली आहे. त्यामुळे यंदाच्या निवडणुकीत कोथरूडची लढत अधिकच रंगतदार होण्याची चिन्हे आहेत.
रोड शोदरम्यान अजित पवार यांनी थेट भाषण न करता जनतेशी संवाद साधत हात हलवत अभिवादन केले. “विकासाला गती देण्यासाठी सक्षम नेतृत्व गरजेचे आहे,” असा अप्रत्यक्ष संदेश त्यांनी दिल्याचे कार्यकर्त्यांकडून सांगण्यात येत आहे. स्थानिक प्रश्न, वाहतूक कोंडी, पाणीपुरवठा आणि नागरी सुविधा या मुद्द्यांवर राष्ट्रवादी काँग्रेस आक्रमक भूमिका घेणार असल्याचे संकेतही या रोड शोमधून मिळाले आहेत.
दरम्यान, अजित पवारांच्या या जोरदार उपस्थितीमुळे राष्ट्रवादी काँग्रेसच्या कार्यकर्त्यांमध्ये उत्साह संचारला आहे. तर दुसरीकडे भाजपच्या गोटात मात्र या घडामोडीमुळे हालचालींना वेग आला आहे. भाजपच्या बालेकिल्ल्यात अजित पवारांची एंट्री म्हणजे आगामी निवडणुकीसाठी मोठा राजकीय इशारा मानला जात आहे. कोथरूड आणि बावधनमधील ही लढत केवळ स्थानिक मर्यादेत न राहता, पुणे शहराच्या राजकारणावर प्रभाव टाकणारी ठरणार आहे. अजित पवारांनी दिलेले हे आव्हान भाजप कसे परतवून लावते, याकडे आता सर्वांचे लक्ष लागले आहे.
