Mobile युजर्सला फायदा, डेटाचे दर कमी होणार, कारण...
Vodafone-Idea, भारतातील तिसरी सर्वात मोठी दूरसंचार कंपनी ऑगस्ट 2021 मध्ये बंद होण्याच्या मार्गावर होती. Vi कडे स्पेक्ट्रम फीचे 96 हजार 300 कोटी रुपये, AGR वर सुमारे 61 हजार कोटी रुपये आणि बँकांचे सुमारे 21 हजार कोटी रुपये कर्ज होते. यातून कंपनीला कोणताही मार्ग दिसत नव्हता. परंतु व्होडाफोन-आयडियामध्ये पुन्हा एकदा कर्मचाऱ्यांची भरती सुरू झाली आहे. मे महिन्याच्या शेवटच्या दिवसात Vi च्या शेअर्सच्या किमतीत वाढ झाली आहे. Vi चे 4G ग्राहकही वाढत आहे.
23 मे 2022 रोजी, Vi चे व्यवस्थापकीय संचालक रविंदर टक्कर यांनी देखील सांगितले की, कंपनी 20 हजार कोटींच्या कराराच्या अगदी जवळ आहे. टक्कर यांच्या मते या गुंतवणुकीमुळे कंपनीचे नशीब बदलू शकते आणि स्पर्धेत टिकू शकते.
20 हजार कोटींची डिल फायनल
व्होडाफोन-आयडियाने एप्रिलमध्ये आधीच 4,500 कोटी रुपये उभारले आहेत. Amazon सोबत 20 हजार कोटींची डीलही फायनल झाली, तर Vi पूर्ण ताकदीनिशी Jio आणि Airtel ला आव्हान देण्यासाठी तयार असेल. 2016 मध्ये जिओ लॉन्च झाला तेव्हा भारतात 8 मोठ्या टेलिकॉम कंपन्या होत्या. जिओने फ्री कॉलिंग आणि डेटाची रणनीती स्वीकारली, ज्यामुळे बाजारपेठेतील स्पर्धा हळूहळू कमी झाली. 2017 मध्ये Telenor, 2018 मध्ये Aircel आणि 2019 मध्ये Tata Docomo. व्होडाफोन आयडियाचे 2018 मध्ये विलीनीकरण झाले.
जिओने दर वाढवले
बाजारातील स्पर्धा कमी केल्यानंतर जिओने टॅरिफ दर वाढवण्यास सुरुवात केली. Amazon आणि Vi च्या डीलनंतर पुन्हा एकदा स्पर्धा वाढणार आहे. अधिक सदस्य वाढवण्याच्या शर्यतीत डेटा टॅरिफ दर कमी केले जाऊ शकतात. अॅमेझॉन गेल्या तीन वर्षांपासून भारताच्या टेलिकॉम मार्केटमध्ये प्रवेश करण्यास उत्सुक आहे. 2020 मध्ये, Amazon भारती एअरटेलमध्ये 2 अब्ज डॉलर्सची गुंतवणूक करू शकते अशी बातमी आली होती. त्यानंतर हे प्रकरण थंडावले.
गुगलची गुंतवणूक
गुगल आणि फेसबुकने मुकेश अंबानींच्या रिलायन्स जिओमध्ये 10.2 अब्ज डॉलरची गुंतवणूक केली आहे. या वर्षी गुगलने एअरटेलमध्ये 1 अब्ज डॉलर्सची गुंतवणूक करण्याचेही सांगितले आहे. दुसरीकडे, कोणत्याही मोठ्या टेक कंपनीने व्होडाफोन-आयडियामध्ये गुंतवणूक केली नाही किंवा अॅमेझॉन कोणत्याही भारतीय टेलिकॉम कंपनीमध्ये गुंतवणूक करू शकली नाही. यादरम्यान दोन्ही कंपन्यांमध्ये चर्चा सुरू होती. अॅमेझॉनला भारतीय बाजारपेठेत प्रवेश करायचा असेल, तर Vi हा सर्वात अचूक पर्याय वाटतो.
