Eknath Shinde : मोठा राजकीय हादरा! उद्धव ठाकरेंकडून एकनाथ शिंदेंना जोरदार धक्का
महानगरपालिका निवडणुकांच्या पार्श्वभूमीवर राज्यात राजकारण चांगलेच तापले आहे. प्रचार सुरू होताच पक्षांतरांची मालिका थांबायचे नाव घेत नाही. तिकीट न मिळाल्याने नाराज झालेले अनेक नेते वेगवेगळ्या पक्षांत जात असल्याने सर्वच पक्षांची डोकेदुखी वाढली आहे.
अशातच निवडणुकीच्या ऐन तोंडावर मुख्यमंत्री एकनाथ शिंदे यांच्या गटाला मोठा धक्का बसला आहे. मुंबईतील कांदिवली पूर्व भागातील प्रभाग क्रमांक २८, हनुमान नगर येथील अनेक पदाधिकाऱ्यांनी उद्धव ठाकरे यांच्या नेतृत्वावर विश्वास दाखवत ठाकरे गटात प्रवेश केला आहे.
शिंदे गटातील महिला पदाधिकारी, उपशाखाप्रमुख आणि स्थानिक नेत्यांनी ‘मातोश्री’वर जाऊन शिवसेना (उद्धव बाळासाहेब ठाकरे) मध्ये अधिकृत प्रवेश केला. या पक्षप्रवेशामुळे मुंबईतील लढतीत ठाकरे गटाला बळ मिळाल्याचे मानले जात आहे.
याचबरोबर गोरेगावमधील काँग्रेसचे काही प्रमुख पदाधिकारीही ठाकरे गटात सामील झाले आहेत. उद्धव ठाकरे यांनी स्वतः सर्वांचे स्वागत करत शिवबंधन बांधले. सतत होणाऱ्या पक्षांतरांमुळे महापालिका निवडणुकीत राजकीय समीकरणे वेगाने बदलत असल्याचे स्पष्ट दिसत आहे.
थोडक्यात
महानगरपालिका निवडणुकांच्या पार्श्वभूमीवर राज्यात राजकारण चांगलेच तापले आहे.
प्रचार सुरू होताच पक्षांतरांची मालिका थांबायचे नाव घेत नाही.
तिकीट न मिळाल्याने नाराज अनेक नेते वेगवेगळ्या पक्षांत जात आहेत.
या परिस्थितीमुळे सर्व पक्षांची डोकेदुखी वाढली आहे.
पक्षांतरांमुळे निवडणूकपूर्व राजकीय तणाव अधिक तीव्र झाला आहे.
