Devendra Fadnavis On Kishor Kadam : किशोर कदम यांची घर वाचवण्यासाठी मदतीची हाक; फडणवीसांनी घेतली तातडीने दखल
मराठी अभिनेते आणि कवी सौमित्र म्हणजेच किशोर कदम यांनी आपल्या अंधेरीतील घराच्या सुरक्षिततेसाठी फेसबुकवर मदतीचे आवाहन केल्यानंतर राज्याचे मुख्यमंत्री देवेंद्र फडणवीस यांनी तातडीने कारवाईचे आदेश दिले आहेत.
किशोर कदम यांनी फेसबुकवर पोस्ट करत चकाल्यातील ‘हवा महल’ सोसायटीच्या पुनर्विकास प्रक्रियेत गंभीर गैरव्यवहार व भ्रष्टाचार होत असल्याचा आरोप केला. त्यांच्या मते, या अनियमिततेमुळे त्यांच्या घरासह सोसायटीतील आणखी 23 सदस्यांचे घर धोक्यात आले आहे. कदम यांनी या प्रकरणी मुख्यमंत्री एकनाथ शिंदे, उपमुख्यमंत्री अजित पवार आणि सहकारमंत्री यांनाही मदतीची विनंती केली होती.
फडणवीसांनी सोशल मीडियावरच त्यांच्या पोस्टची दखल घेत उत्तर दिले. त्यांनी लिहिले की, "किशोरजी, आपली ही तक्रार मी सहकार सचिव प्रवीण दराडे आणि एसआरएचे मुख्य कार्यकारी अधिकारी महेंद्र कल्याणकर यांना कळवली आहे. त्यांनी त्वरित लक्ष घालून आपल्याशी संपर्क साधावा, अशा सूचना दिल्या आहेत."
कदम यांच्या मते, सोसायटीच्या कमिटीने सभासदांना अंधारात ठेवून महत्वाची कागदपत्रे लपवली असून, पुनर्विकासाशी संबंधित निर्णय पारदर्शकपणे घेतले गेले नाहीत. त्यामुळे या प्रक्रियेत तातडीने हस्तक्षेप करून सदस्यांचे हक्क अबाधित ठेवावेत, अशी त्यांची मागणी आहे. ही घटना पुन्हा एकदा दाखवून देते की सोशल मीडियाच्या माध्यमातून मांडलेल्या तक्रारींना प्रशासनाकडून त्वरित प्रतिसाद मिळू शकतो.
