Satara Female Doctor case : फलटणमधील महिला डॉक्टर प्रकरण; निवासी डॉक्टरांचा संप अखेर मागे

थोडक्यात

• फलटणमधील महिला डॉक्टर प्रकरण

• निवासी डॉक्टरांचा संप अखेर मागे

• मुख्यमंत्री फडणवीस यांच्यातील चर्चेनंतर मार्डने हा निर्णय घेतला

(Satara Doctor case) सातारा जिल्ह्यातील फलटण उपजिल्हा रुग्णालयात कार्यरत असलेल्या महिला डॉक्टरच्या आत्महत्येच्या प्रकरणाने राज्यभरात खळबळ उडवली आहे. या घटनेत धक्कादायक बाब समोर आली असून, डॉक्टरने आत्महत्येपूर्वी आपल्या हातावरच मृत्यूस कारणीभूत असलेल्या दोन व्यक्तींची नावे लिहिली.

मृत डॉक्टरने आत्महत्येपूर्वी आपल्या हातावर सुसाईड नोट लिहिली होती, त्यात तिने धक्कादायक आरोप केले आहेत. त्या नोटमध्ये डॉक्टरने लिहिले आहे की, "PSI गोपाल बदने यांनी तिच्यावर पाच महिन्यांपासून वारंवार अत्याचार आणि लैंगिक शोषण केले, तसेच पोलीस अधिकारी प्रशांत बनकर यांनी तिला मानसिक छळ केला". त्या महिला डॉक्टरने या दोघांवर लैंगिक अत्याचार आणि मानसिक छळाचे गंभीर आरोप केले आहेत. याप्रकरणी दोन्ही आरोपींना आता 14 दिवसांची न्यायालयीन कोठडी सुनावण्यात आली आहे.

याच पार्श्वभूमीवर राज्यभरातील निवासी डॉक्टर संप पुकारला होता. फलटणमध्ये मृत्यू झालेल्या डॉक्टर महिलेचा तपास योग्य दिशेने व्हावा यासाठी निवासी डॉक्टरांनी हा संप पुकारला होता. ज्यामध्ये ओपीडी बंद करण्यात आले होते. मात्र आता निवासी डॉक्टरांचा संप अखेर मागे घेण्यात आला असून गेल्या दोन दिवसांपासून सुरू असलेला निवासी डॉक्टरांचा संप अखेर मागे घेतला आहे. सेंट्रल मार्ड आणि बीएमसी मार्डने मुख्यमंत्री देवेंद्र फडणवीस यांच्या आश्वासनानंतर दोन दिवसांची राज्यव्यापी संप मागे घेतला आहे.

मंगळवारी रात्री कोर कमिटी आणि मुख्यमंत्री फडणवीस यांच्यातील चर्चेनंतर मार्डने हा निर्णय घेतला आहे. डॉ. संपदा मुंडे प्रकरणातील प्रमुख मागण्यांबाबत झालेल्या चर्चेनंतर हा निर्णय घेण्यात आला असून गेल्या दोन दिवसांपासून राज्यातील सर्व शासकीय आणि महापालिका वैद्यकीय महाविद्यालयांतील निवासी डॉक्टरांनी संपात सहभाग घेतला होता. यावेळी केवळ आपत्कालीन वैद्यकीय सेवा सुरू ठेवण्यात आल्या होत्या. हे कामबंद आंदोलन डॉ. संपदा मुंडे यांना न्याय मिळावा आणि राज्यातील निवासी डॉक्टरांच्या सुरक्षेच्या चांगल्या उपाययोजना करण्यात याव्या या मागण्यांसाठी करण्यात आले होते.