Uddhav Thackeray : ठाकरे गटाला धक्का; माजी महापौर शिंदे गटात दाखल
शिवसेना उद्धव बाळासाहेब ठाकरे गटाला मोठा झटका बसला आहे. मागील ३७ वर्षांपासून शिवसेनेशी एकनिष्ठ असलेले आणि माजी महापौर त्र्यंबक तुपे यांनी अखेर एकनाथ शिंदे यांच्या नेतृत्वाखालील शिंदे गटात प्रवेश केला आहे.
मुंबईत मुख्यमंत्री एकनाथ शिंदे यांच्या उपस्थितीत तुपे यांचा पक्षप्रवेश झाला. काही दिवसांपूर्वीच त्यांनी महापौरपदाचा राजीनामा दिला होता. तेव्हाच त्यांच्या शिंदे गटात जाण्याची चर्चा रंगली होती. अखेर आज त्यांनी शिंदे गटात प्रवेश करून या चर्चेला पूर्णविराम दिला.
त्र्यंबक तुपे यांनी शिवसेनेत सहसंपर्कप्रमुख म्हणून काम केले असून त्यांनी महापौरपदही भूषवले आहे. दीर्घकाळ पक्षनिष्ठा जोपासल्यानंतर त्यांनी गटबदल केला आहे. या घडामोडीनंतर छत्रपती संभाजीनगरमध्ये शिंदे गटाची ताकद अधिक वाढल्याचे मानले जात आहे.
गटबदलानंतर तुपे यांनी प्रतिक्रिया देताना म्हटले की, "माझा उद्धव ठाकरे यांच्याशी कुठलाही वाद नाही. मात्र माझ्या वॉर्डाच्या विकासासाठी हा निर्णय घेतला आहे." दरम्यान, स्थानिक स्वराज्य संस्थांच्या निवडणुका लवकरच जाहीर होण्याची शक्यता असून सर्वच पक्ष मोर्चेबांधणीला लागले आहेत. अशा वेळी तुपे यांचा गटबदल ठाकरे गटासाठी मोठा धक्का मानला जात आहे.
