IPL 2024 : हैदराबादच्या पराभवानं 'या' संघांना होणार फायदा, CSK आणि RR चं नवीन कनेक्शन आलं समोर, जाणून घ्या पूर्ण समीकरण
IPL 2024 Play Offs : आयपीएल २०२४ मध्ये आज सनरायजर्स हैदराबाद आणि गुजरात टायटन्स यांच्यात सामना रंगणार आहे. गुजरात टायटन्स प्ले ऑफच्या शर्यतीतून बाहेर झाली आहे. गुजरातसाठी हा सामना महत्त्वाचा नाही. परंतु, सनरायजर्स हैदराबादला प्ले ऑफमध्ये जागा पक्की करण्यासाठी हा सामना जिंकावा लागणार आहे. तर चेन्नई सुपर किंग्ज आणि राजस्थान रॉयल्स यांच्या नजरा या सामन्याला लागल्या आहेत. सनरायजर्स हैदराबादचा या सामन्यात पराभव झाल्यास चेन्नई आणि राजस्थानला याचा फायदा होणार आहे.
आयपीएल गुणतालिकेची स्थिती
कोलकाता नाईट रायडर्सचा संघ १३ सामन्यांमध्ये १९ गुण मिळवून गुणतालिकेत पहिल्या स्थानावर पोहोचला आहे. तर राजस्थान रॉयल्सचे १३ सामन्यांमध्ये १६ गुण आहेत, त्यामुळे राजस्थानचा संघ दुसऱ्या क्रमांकावर आहे. तर चेन्नई सुपर किंग्ज आणि सनरायजर्स हैदराबादचेही १४-१४ गुण आहेत. तर आरसीबीचे १२ आणि लखनऊ सुपर जायंट्सचेही १२ गुण आहेत.
हैदराबादच्या विजयामुळं राजस्थानचं नंबर २ धोक्यात
एसआरएचने आजच्या सामन्यात विजय मिळवल्यास त्यांचे १६ गुण होतील आणि प्ले ऑफसाठी क्वालिफाय होईल. हैदराबादचे दोन सामने बाकी आहेत. जर हैदराबादने दोन सामन्यांत विजय मिळवला, तर त्यांचे संघाचे १८ गुण होतील. राजस्थान रॉयल्सला मागे टाकून त्यांचा संघ गुणतालिकेत दुसऱ्या स्थानावर पोहचेल.
चेन्नई सुपर किंग्जचाही नंबर २ वर डोळा
हैदराबादचा या सामन्यात पराभव झाल्यास सीएसकेला फायदा होणार आहे. चेन्नईचे १४ गुण असून एक सामना खेळायचा बाकी आहे. सीएसकेनं जर तो शेवटचा सामना मोठ्या फरकानं जिंकला, तर त्यांचे १६ गुण होतील आणि चांगल्या रनरेटमुळं ते नंबर २ वर पोहचू शकतात. यासाठी हैदराबादचा त्यांच्या दोन्ही सामन्यांत आणि राजस्थानला त्यांच्या शेवटच्या सामन्यात पराभव पत्कारावा लागेल.
RCB आणि CSK चा सामना महत्त्वाचा
जर सनरायजर्स हैदराबाद त्यांच्या दोन्ही सामन्यांमध्ये पराभूत झाला, तर आरसीबी आणि सीएसकेचा सामना खूप महत्वाचा ठरेल.
