Indian Meteorological Department : राज्यात थंडीचा जोर ओसरला; मुंबईत प्रदूषणामुळे आरोग्याच्या तक्रारी वाढल्या

राज्यासह देशभरात गेल्या काही दिवसांपासून हवामान सतत बदलताना दिसत आहे. कधी पावसाची हजेरी तर कधी तीव्र थंडी जाणवत आहे. मात्र उत्तरेकडून येणारे थंड वारे कमी झाल्यामुळे आता राज्यातील थंडीचा जोर काहीसा ओसरला आहे. मागील काही दिवसांत महाराष्ट्रात कडाक्याची थंडी अनुभवायला मिळाली. उत्तर भारतात वाढलेल्या गारव्याचा परिणाम राज्यावरही झाला होता. पण सध्या हा प्रभाव कमी होत असून थंडी थोडी कमी झाली आहे. तरीही डिसेंबर महिन्यापर्यंत गारवा जाणवत राहणार आहे. वातावरणातील बदलांमुळे अनेक ठिकाणी आरोग्याच्या तक्रारी वाढल्या आहेत. विशेषतः मुंबईत हवेतील प्रदूषण मोठ्या प्रमाणात वाढले आहे. त्यामुळे सर्दी, खोकला, घसा दुखणे आणि तापाचे रुग्ण वाढत आहेत. डॉक्टरांनी नागरिकांना बाहेर जाताना मास्क वापरण्याचा सल्ला दिला आहे. मुंबईत सकाळी आणि रात्री थंडी जाणवत असून दिवसा उष्णता जास्त असते.

पुण्यातील हवामान पुढील दोन दिवस स्थिर राहण्याचा अंदाज आहे. शहर आणि आसपासच्या भागात किमान तापमान कमीच आहे. गेल्या आठवड्यापासून तापमान 10 अंश सेल्सिअसच्या खाली जात आहे. त्यामुळे पुणेकरांना चांगलाच गारवा जाणवत आहे. पुढील दोन दिवस थंडी कायम राहील, असे हवामान विभागाने सांगितले आहे.

राज्यातील काही भागांत अतिशय कमी तापमानाची नोंद झाली आहे. जेऊर येथे सर्वात कमी तापमान आढळले. धुळ्यात 6.2 अंश, परभणीत 7.2 अंश तापमान नोंदवले गेले. मालेगाव, नाशिक, गोंदिया, भंडारा आणि यवतमाळ येथे तापमान सुमारे 10 अंश होते. अहिल्यानगरमध्ये तापमान 9 अंशांच्या आसपास होते. येत्या काही दिवसांत तापमानात चढ-उतार होत राहतील. विदर्भात गारवा अधिक जाणवण्याची शक्यता आहे.

हवामान खात्याच्या माहितीनुसार, 16 डिसेंबर रोजी तामिळनाडू, जम्मू-काश्मीर, पुद्दुचेरी आणि हिमाचल प्रदेशातील काही भागांत हलका ते मध्यम पाऊस पडू शकतो. बिहारमधील पाटणा, भागलपूर आणि दरभंगा येथे दाट धुक्याचा इशारा देण्यात आला आहे. दिल्लीमध्येही हवामान बदलण्याची शक्यता असून प्रदूषणाची पातळी वाढू शकते. धुक्यामुळे नागरिकांना अडचणी येऊ शकतात.

मुंबईसह कोकण, विदर्भ, मराठवाडा, पश्चिम महाराष्ट्र आणि घाटमाथ्यावर हवामान प्रामुख्याने स्थिर राहील. मुंबईत दिवसाचे तापमान जास्त राहील, मात्र पहाटे आणि रात्री थंडी जाणवेल. डोंगराळ भागात धुके पडण्याची शक्यता आहे. राज्यातील सर्वाधिक थंड वातावरण विदर्भात राहू शकते, तर इतर भागांत किमान तापमानात थोडी घट होऊन थंडी कमी होण्याची शक्यता आहे.

दरम्यान, रस्त्यावरील धुळीमुळे होणारे प्रदूषण कमी करण्यासाठी महानगरपालिकेने विविध उपाययोजना केल्या आहेत. टँकरद्वारे पाणी फवारणी करण्यात येत असून गेल्या दोन महिन्यांत मोठ्या प्रमाणात धूळ साफ करण्यात आली आहे. अनेक बांधकाम ठिकाणी सेन्सर बसवण्यात आले असून, प्रदूषण नियंत्रणासाठी सतत प्रयत्न सुरू आहेत.