Lifestyle : लिपस्टिक घेताना 'या' गोष्टींकडे द्या लक्ष, परिपूर्ण लूक मिळवणं होईल सोपं
मेकअपमध्ये लिपस्टिकला नेहमीच खास स्थान आहे. अनेकदा महिलांकडे मेकअपसाठी वेळ नसला तरी फक्त काजळ आणि लिपस्टिक एवढ्यानेच त्यांचा लूक खुलतो. योग्य शेडची लिपस्टिक लावली, तर ती चेहऱ्याचे सौंदर्य वाढवते, आत्मविश्वास वाढवते आणि संपूर्ण लूकला एक वेगळीच उंची देते. मात्र बाजारात असंख्य ब्रँड्स, शेड्स आणि फिनिश उपलब्ध असल्यामुळे कोणती लिपस्टिक आपल्याला शोभेल याबाबत अनेकदा गोंधळ उडतो.
लिपस्टिक निवडताना सर्वप्रथम त्वचेच्या टोनचा विचार करणे महत्त्वाचे आहे. गोरी त्वचा असलेल्यांना गुलाबी, पीच किंवा लाल शेड्स उठून दिसतात, तर मध्यम टोनवर तपकिरी किंवा जांभळे रंग सुंदर वाटतात. गव्हाळ किंवा गडद त्वचेसाठी मॅरून, वाईन रेड किंवा डार्क शेड्स आकर्षक दिसतात.
याशिवाय प्रसंगानुसारही लिपस्टिक निवडली पाहिजे. ऑफिस वा दैनंदिन वापरासाठी हलकी, न्यूड किंवा क्रीम बेस्ड लिपस्टिक योग्य ठरते, तर पार्टी वा समारंभांसाठी मॅट किंवा ग्लॉसी फिनिशची लिपस्टिक परिपूर्ण लूक देते. जर ओठ कोरडे असतील तर हायड्रेटिंग गुणधर्म असलेली लिपस्टिक घ्या, आणि त्वचा तेलकट असेल तर मॅट फिनिश सर्वोत्तम मानली जाते.
आजच्या व्यस्त जीवनशैलीत सतत टच-अप करणे शक्य नसते. त्यामुळे लिपस्टिक खरेदी करताना ती दीर्घकाळ टिकणारी आणि ट्रान्सफर-प्रूफ आहे की नाही, हे तपासणे गरजेचे आहे. अशी लिपस्टिक खाण्या-पिण्यामुळे खराब होत नाही आणि तासन्‌तास टिकते.
तितकेच महत्त्वाचे म्हणजे लिपस्टिकमधील घटक तपासणे. काही ब्रँड्समध्ये पॅराबेन, सिलिकॉन किंवा अल्कोहोलसारखे हानिकारक रसायनं वापरली जातात. त्यामुळे शक्यतो नैसर्गिक घटक असलेली किंवा विश्वासार्ह ब्रँडची लिपस्टिकच निवडावी. ऑनलाइन खरेदी करताना इतर ग्राहकांचे रिव्ह्यू वाचून मगच खरेदी करणे फायदेशीर ठरते.
थोडक्यात सांगायचे तर, त्वचेचा टोन, प्रसंग, टिकाऊपणा, सुरक्षित घटक आणि ब्रँडची विश्वासार्हता या काही साध्या गोष्टी लक्षात ठेवल्या, तर प्रत्येक महिलेला तिच्यासाठी परफेक्ट लिपस्टिक निवडणे अगदी सोपे ठरते.
