भरधाव एसटीची दुचाकीस धडक; पाच वर्षीय चिमुकला ठार
सुरज दाहाट | अमरावती : मोर्शी येथून भरधावपणे जाणाऱ्या एसटीने दुचाकीला धडक दिल्यामुळे मोठा अपघात झाला आहे. या अपघातात पाच वर्षीय बालक जागीच ठार झाला. तर आईवडील दोघेही गंभीररीत्या जखमी झाले आहेत. ही घटना डवरगाव फाट्यावर घडली.
अन्वित पंकज वलगावकर (वय ५, रा. वर्धा) असे घटनेत ठार झालेल्या चिमुकल्याचे नाव आहे. घटनेनंतर संतप्त नागरिकांनी राष्ट्रीय महामार्ग रोखून दीड तास चक्काजाम केला. माहुली जहागीर पोलिसांनी घटनास्थळ गाठून तातडीने जखमींना उपचारासाठी जिल्हा सामान्य रुग्णालयात दाखल केले व संतप्त नागरिकांना शांत केले.
महितीनुसार, वर्धा जिल्ह्यातील अंतोरा आष्टी येथील पंकज वलगावकर हे आपली पत्नी कविता आणि मुलगा अन्वित यांचेसह आपल्या दुचाकी (क्र. एम एच ३२, ए क्यू ६११०) ने अमरावती येथे काही कामानिमित्त येत होते. याचवेळी मागून भरधावपणे येणाऱ्या वरुड-अमरावती एसटी (क्र.एम एच ०६, एस ८९५९) ने दुचाकीस धडक दिली. यामध्ये समोर बसलेला अन्वित चक्क एसटी बसच्या चाकाखाली आला व जागीच ठार झाला.
तर पंकज आणि कविता दोघेही गंभीररीत्या जखमी झाले. घटनेनंतर डवरगाव येथील संतप्त नागरिकांनी क्षणातच महामार्ग बंद केला. डवरगाव येथील महामार्गावर अनेकदा अपघात झाले असून याठिकाणी गतिरोधक बसवावे या मागणीसाठी शेकडो निवेदने प्रशासनाला देण्यात आली. मात्र, प्रशासन मूग गिळून बसल्याने संतप्त नागरिकांनी तब्बल दीड तास महामार्ग रोखून धरला.
माहुली जहागीर पोलीस स्टेशनला घटनेची माहिती मिळताच प्रभारी पो.नि.जयसिंग राजपूत ए.एस.आय हंबर्डे, नापोका पोटे, किरण साधनकर, गजानन धर्माळे, विनोद वाघमारे आदींनी घटनास्थळी धाव घेऊन तातडीने जखमींना उपचारासाठी जिल्हा सामान्य रुग्णालयात दाखल केले. तसेच अन्वितचा मृतदेह उत्तरीय तपासणी साठी पाठविण्यात आला. संतप्त आंदोलकांना विश्वासात घेऊन आपली मागणी पूर्ण करण्यासाठी प्रशासनाला पत्रव्यवहार करू, असे आश्वासन पोलीस अधिकाऱ्यांनी दिल्यानंतर जमावाने आंदोलन मागे घेतले. व महामार्गावरील वाहतूक सुरळीत करण्यात आली. या घटनेने सर्वत्र हळहळ व्यक्त होत आहे.
