Ajit Pawar : नवाब मलिक कोणत्या गटासोबत बसणार? अजित पवार म्हणाले...
विधीमंडळाच्या हिवाळी अधिवेशनाला आजपासून सुरुवात होत आहे. नवाब मलिक वैद्यकीय जामिनावर बाहेर आहेत आणि आज नवाब मलिक हिवाळी अधिवेशनाला हजेरी लावणार आहेत. फेब्रुवारी 2022 मध्ये ईडीनं गोवावाला कंपाऊंड प्रकरणात मनी लाँड्रिंग कायद्याखाली नवाब मलिक यांना अटक केली होती. 11 ऑगस्टला सर्वोच्च न्यायालयानं मलिकांना मोठा दिलासा देत, वैद्यकीय कारणास्तव जामीन मंजूर केला. नवाब मलिक आज विधानसभेच्या कामकाजात सहभागी होणार आहे.
अधिवेशनात मलिक हे अजित पवार गटाच्या आमदारांसोबत बसतात, की शरद पवार गटाच्या आमदारांसोबत बसणार याकडे सर्वांचे लक्ष लागले आहे. काही दिवसांपूर्वी नवाब मलिक अजित पवार गटासोबत असल्याच्या चर्चा रंगल्या होत्या. मात्र नवाब मलिक यांनी याबद्दल काही प्रतिक्रिया दिली नाही आहे
आता नवाब मलिक नागपूर विधानभवनात दाखल झाले आहेत. तसेच नवाब मलिक अनिल पाटलांच्या कार्यालयात दाखल झाले आहेत. अनिल पाटील हे अजित पवार गटाचे मुख्य प्रतोद आहेत. याच पार्श्वभूमीवर आता अजित पवार यांनी प्रतिक्रिया दिली आहे. अजित पवार म्हणाले की, नवाब मलिक स्वत:चा निर्णय घेण्यास खंबीर आहेत. नवाब मलिकांना मी फोन केला होता. माझा फोनवरुन संवाद झाला. मलिकांना स्वागतासाठी फोन केला होता. असं अजित पवार म्हणाले.