मुख्यमंत्र्यांची भूमिका गुळाच्या गणपतीसारखी; सुषमा अंधारेंचा टोला

मुंबई : मुख्यमंत्री एकनाथ शिंदे यांची भूमिका गुळाचा गणपतीसारखी झाली असल्याची गंभीर टिका शिवसेना उपनेत्या सुषमा अंधारे यांनी केली आहे. शिवसेनेच्या वतीने लातूर शहरात पदाधिकाऱ्यांच्या आढावा बैठकीचे आयोजन करण्यात आले होते. यावेळी त्या बोलत होत्या.

सुषमा अंधारे यांनी शिवसेनेत प्रवेश केल्यानंतर पहिल्याच दिवसापासून शिंदे गटोविरोधात आक्रमक भूमिका घेतली आहे. आजही त्यांनी शिंदे - फडणवीस सरकारला लक्ष्य केले. आरोग्य मंत्री तानाजी सावंत यांनी साथीचे रोग कळत नाही. आणि कृषीमंत्री अब्दुल सत्तार यांना हेक्टर आणि एकर यांच्या मधला फरक कळत नाही, अशांना मंत्री करून मुख्यमंत्री एकनाथ शिंदे यांची भूमिका गुळाचा गणपतीसारखे झाल्याची टीका सुषमा अंधारे यांनी केली आहे.

दरम्यान, तुमच्या गटातील आमदारांना 50 खोक्यांची ऑफर दिली हे सत्य आहे. तुमच्या अनेक ऑडिओ क्लिपदेखील व्हायरल झाल्या आहेत. तुम्हाला या सगळ्यांना उत्तर द्यायचे होते तर त्याचदिवशी का नाही दिले, असा सवाल सुषमा अंधारे यांनी धक्काबुक्की करणाऱ्या शिंदे गटाच्या आमदारांना केला आहे. तर, भाजपाची आंदोलने ही इव्हेंट असतात. भाजपा असे अनेक पॉलिटिकल इव्हेंट अधूनमधून करत असते, अशी टीकाही त्यांनी भाजपवर केली होती.