Punjab Crime : भयंकर! अल्पवयीन मुलीचं अपहरण करून चालत्या कारमध्ये अत्याचार; पोलिसांकडून आरोपींचा शोध सुरू
पंजाबमध्ये अल्पवयीन मुलीवर अत्याचार केल्याची धक्कादायक घटना समोर आली आहे. या मुलीवर चालत्या कारमध्ये त्या नराधमांनी बलात्कार करून तिला अपहरणस्थळी पुन्हा सोडून दिल्याचे समजते. 23 जुलै रोजी दोन अज्ञात पुरूषांनी 16 वर्षीय मुलीचे अपहरण करून चालत्या कारमध्ये बलात्कार केला. त्यानंतर तिला अपहरणाच्या ठिकाणी सोडून दिल्याचे पोलिसांनी शुक्रवारी सांगितले. मोहालीतील झिरकपूर येथे चंदीगड-अंबाला राष्ट्रीय महामार्गाजवळ व्हीआयपी रोडवरील मेट्रो मॉलजवळ रात्री 8 वाजताच्या सुमारास ही घटना घडली.
पीडितेच्या म्हणण्यानुसार, ती एका सलूनमधील काम संपवून ऑटोरिक्षाची वाट पाहत असताना दोन्ही आरोपींनी तिला जबरदस्तीने कारमध्ये ओढले. प्रवासादरम्यान त्यांनी तिला मारहाण केली आणि चंदीगडमधील ट्रिब्यून चौकजवळील एका निर्जन भागात नेले. हल्लेखोरांनी तिच्यावर लैंगिक अत्याचार करताना तिच्या भावाचे नाव घेतल्याचे समजते. गुन्हा केल्यानंतर त्यांनी तिला परत त्याच ठिकाणी सोडले जिथून तिचे अपहरण केले होते.
याप्रकरणी पीडितेच्या आईने तक्रार दाखल केली आहे. त्यानंतर झिरकपूर पोलिसांनी गुन्हा दाखल केला. पोलिसांनी सांगितले की, आरोपीची ओळख पटवून त्यांना अटक करण्यासाठी तपास सुरू आहे.
