Chhattisgarh Train Accident : बिलासपूर प्रवासी ट्रेनची मालगाडीला धडक; सहा जणांचा मृत्यू, तर अनेक जखमी
छत्तीसगडमधील बिलासपूर येथे मंगळवारी दुपारी मोठी रेल दुर्घटना घडली. कोरबा- बिलासपूर मार्गावर धावणारी कोरबा पॅसेंजर MEMU ट्रेन लालखदान परिसरात एका मालगाडीला धडकली. या भीषण अपघातात किमान सहा जणांचा मृत्यू झाला असून अनेक प्रवासी जखमी झाल्याची माहिती समोर आली आहे.
धडकेत प्रवासी ट्रेनचे डबे मोठ्या प्रमाणात नुकसानग्रस्त झाले. अपघातानंतरचे व्हिडिओ आणि छायाचित्रांमध्ये ट्रेनचा इंजिन भाग मालगाडीच्या कंटेनरवर चढल्याचे स्पष्ट दिसते. काही डबे रुळांवरून घसरले असून घटनास्थळी तुटलेले लोखंडी साहित्य आणि भगदाड पडलेले कोच दिसून येत आहेत.
अपघाताची माहिती मिळताच रेल्वे अधिकारी, पोलीस दल आणि NDRF पथक घटनास्थळी दाखल झाले. बचाव आणि मदतकार्य तातडीने सुरू असून अडकलेल्या प्रवाशांना बाहेर काढण्याचे काम युद्धपातळीवर सुरू आहे. जखमींना जवळच्या शासकीय आणि खासगी रुग्णालयात दाखल करण्यात आले असून गंभीर जखमींवर तातडीने उपचार सुरू आहेत.
रेल्वे अधिकाऱ्यांनी अपघातस्थळी पंचनामा आणि तपास प्रक्रिया सुरू केली आहे. या भीषण धडकेचे नेमके कारण अद्याप स्पष्ट झाले नसून सिग्नलिंग त्रुटी की मानवी चूक, याबाबत तपास सुरू आहे. दरम्यान, या मार्गावरील रेल वाहतूक तात्पुरती विस्कळीत झाली असून काही गाड्या वळवण्यात किंवा स्थगित करण्यात आल्या आहेत.
अपघातानंतर परिसरात उपस्थित प्रवासी आणि स्थानिक नागरिकांमध्ये भीतीचे वातावरण निर्माण झाले. घटनास्थळी मोठ्या संख्येने लोकांची गर्दी झाली असून प्रशासनाने लोकांना अफवांवर विश्वास न ठेवण्याचे आणि अधिकृत माहितीची प्रतीक्षा करण्याचे आवाहन केले आहे. या दुर्घटनेने पुन्हा एकदा रेल्वे सुरक्षेच्या प्रश्नाला वाचा फोडली आहे. अपघातातील मृतांना श्रद्धांजली आणि जखमींच्या प्रकृतीबद्दल लोकांमध्ये प्रार्थना व्यक्त होत आहेत.
