Droupadi Murmu Rafale flight : राष्ट्रपती द्रौपदी मुर्मू यांची राफेल लढाऊ विमानातून ऐतिहासिक भरारी!
थोडक्यात
राष्ट्रपती द्रौपदी मुर्मू यांची राफेलमधून सफर
अंबाला एअरबेसवरून केले ऐतिहासिक उड्डाण
भारताच्या संरक्षण सामर्थ्याचं आकाशातलं नवं पर्व
भारताच्या राष्ट्रपती श्रीमती द्रौपदी मुर्मू यांनी आज (29 ऑक्टोबर 2025) हरियाणातील अंबाला वायुदल तळावरून राफेल लढाऊ विमानातून ऐतिहासिक भरारी घेतली. भारतीय सशस्त्र दलांच्या सर्वोच्च कमांडर म्हणून ही त्यांची अभिमानास्पद आणि ऐतिहासिक कामगिरी ठरली आहे. ही भरारी राष्ट्रपती मुर्मू यांच्या राष्ट्रपतीपदावरील आणखी एक मोठी उपलब्धी मानली जात आहे. त्या राफेल फाइटर जेटमधून भरारी घेणाऱ्या भारताच्या पहिल्या राष्ट्रपती आणि पहिल्या आदिवासी महिला राष्ट्रपती ठरल्या आहेत. याआधी 8 एप्रिल 2023 रोजी त्यांनी आसाममधील तेजपूर वायुदल तळावरून सुखोई-30 एमकेआय लढाऊ विमानातून भरारी घेतली होती. त्या वेळीही त्या अशी भरारी घेणाऱ्या तिसऱ्या राष्ट्रपती आणि दुसऱ्या महिला राष्ट्रपती ठरल्या होत्या.
भारताच्या संरक्षण क्षमतेचा अभिमान
राष्ट्रपती मुर्मू यांची ही राफेलमधील भरारी भारताच्या आधुनिक संरक्षण क्षमतेचं आणि वायुदलाच्या सामर्थ्याचं प्रदर्शन आहे. फ्रेंच कंपनी डसॉल्ट एव्हिएशन यांनी निर्मित केलेल्या राफेल विमानांना सप्टेंबर 2020 मध्ये भारतीय वायुदलात औपचारिकरित्या सामील करण्यात आले. अंबालातील 17 स्क्वाड्रन ‘गोल्डन अ‍ॅरो’ मध्ये पहिल्या पाच राफेल विमानांचा समावेश करण्यात आला होता.
राफेल भारताच्या आकाशातील अभेद्य ढाल
राफेल हे बहुउद्देशीय, अत्याधुनिक आणि उच्च गतीचं लढाऊ विमान आहे. या विमानाने अलीकडच्या ‘ऑपरेशन सिंदूर’ दरम्यान पाकिस्तान अधिकृत काश्मीरमधील दहशतवादी तळांवर केलेल्या कारवाईत निर्णायक भूमिका बजावली होती.
प्रेरणादायी क्षण
राष्ट्रपती द्रौपदी मुर्मू यांची ही भरारी केवळ भारतीय संरक्षण शक्तीचं प्रतीक नाही, तर देशातील महिलांसाठीही प्रेरणादायी संदेश आहे. महिलाही आज देशाच्या सुरक्षेच्या प्रत्येक स्तरावर शौर्य दाखवू शकतात, हे त्यांनी पुन्हा सिद्ध केलं आहे. भारताच्या इतिहासात आजचा दिवस अभिमानाने नोंदला जाईल जेव्हा देशाच्या सर्वोच्च पदावर असलेल्या महिला राष्ट्रपतीने राफेलसारख्या शक्तिशाली लढाऊ विमानातून आकाश गाठलं!
