Vaishanvi Hagwane Case : वैष्णवी हगवणे प्रकरणात फॉर्च्युनर गाडी बावधन पोलिसांकडून जप्त
वैष्णवी हगवणे प्रकरणात तपासादरम्यान महत्त्वपूर्ण बाब उघडकीस आली असून MH १४ KU २०२२ क्रमांकाची टोयोटा फॉर्च्युनर गाडी बावधन पोलिसांनी आता जप्त केली आहे. सदर गाडी टॉप मॉडेल असून उच्च किंमतीची आहे. ही गाडी वैष्णवीच्या विवाहप्रसंगी तिच्या वडिलांनी हगवणे कुटुंबाला मुलीला सुख लाभावं, या भावनेतून दिली होती. विशेष म्हणजे, या गाडीची चावी लग्नाच्या दिवशी स्टेजवर उपमुख्यमंत्री अजितदादा पवार यांच्या हस्ते हगवणे कुटुंबाला प्रदान करण्यात आली होती.
तपासादरम्यान पोलिसांनी या गाडीचा तपशील, कागदपत्रे आणि मालकी हक्क याचा सखोल अभ्यास केला असून सध्या ती पोलिसांच्या ताब्यात आहे. यासोबतच, वैष्णवीच्या वडिलांनी लग्नावेळी सुमारे ५० तोळे सोने हगवणे कुटुंबाला दिले असल्याचीही माहिती समोर आली आहे.
या फॉर्च्युनर गाडीचा कायदेशीर हक्क कोणाकडे आहे याबाबतचा वाद सध्या न्यायालयात आहे. न्यायालयाच्या आदेशानुसार पुढील कायदेशीर कारवाई करण्यात येईल, असे बावधन पोलीस ठाण्याचे अधिकारी म्हणाले. या प्रकरणाच्या तपासात पोलिसांकडून प्रत्येक पुरावा सखोलपणे गोळा करून न्यायप्रक्रियेला हातभार लावला जात आहे.
