Sharad Pawar : कोकणवासीयांसाठी शरद पवार यांची रेल्वे मंत्र्यांकडे महत्त्वाची मागणी
थोडक्यात
कोकणवासीयांसाठी शरद पवारांची रेल्वे मंत्र्यांकडे महत्त्वाची मागणी
या स्थानकांवर एक्स्प्रेस गाड्यांना थांबा देण्याची विनंती
कोकणवासीयांसाठी या पत्रात त्यांनी विशेष मागणी केली आहे
रेल्वे मंत्री अश्विनी वैष्णव यांना राष्ट्रवादी काँग्रेस पार्टी शरदचंद्र पवार पक्षाचे राष्ट्रीय अध्यक्ष शरद पवार (Sharad Pawar) यांनी एक पत्र लिहिले आहे. कोकणवासीयांसाठी या पत्रात त्यांनी विशेष मागणी केली आहे.एक्स्प्रेस गाड्यांना कुडाळ, कणकवली व सावंतवाडी या स्थानकांवर थांबा देण्याची विनंती त्यांनी या पत्राच्या माध्यमातून केली आहे.
आपल्या पत्रात खा. शरद पवार म्हणालेत की, सिंधुदुर्ग हा भारतातील पहिला पर्यटन जिल्हा असून, आपल्या निसर्गरम्य समुद्रकिनाऱ्यांसाठी, ऐतिहासिक किल्ल्यांसाठी आणि समृद्ध कोकणी वारशासाठी प्रसिद्ध आहे. मात्र, अनेक लांब पल्ल्याच्या एक्सप्रेस गाड्या सध्या या जिल्ह्यातून न थांबता जात असल्याने येथील नागरिक, विद्यार्थी, व्यावसायिक आणि पर्यटक यांना मोठ्या अडचणींचा सामना करावा लागत आहे. कुडाळ, कणकवली किंवा सावंतवाडी या स्थानकांवर त्यामुळे निवडक एक्सप्रेस गाड्यांना थांबे देण्यात यावेत असे ते या पत्रात म्हणाले आहेत.
प्रायोगिक तत्त्वावर पर्यटन हंगामात व प्रमुख सणांच्या काळात जसे की गणेश चतुर्थी, दसरा, दिवाळी, नववर्ष, होळी आणि उन्हाळी सुट्टी दरम्यान याची अंमलबजावणी करा. यामुळे या भागातील पर्यटनाला चालना मिळेल, विद्यार्थी, व्यावसायिक आणि रुग्ण यांच्या प्रवासात सोय होईल. स्थानिक उत्पादने व हस्तकलेच्या वाहतुकीला प्रोत्साहन मिळेल. योग्य न्याय तसेच सामान्य जनतेच्या मागणीला मिळेल असे ते म्हणाले आहेत. 32 गाड्यांचा खा. शरद पवार यांनी उल्लेख केला असून या यादीतील निवडक एक्सप्रेस गाड्यांना कुडाळ, कणकवली किंवा सावंतवाडी स्थानकांवर थांबे देण्यात यावे असे ते म्हणाले.
