'मला मंत्री करण्याची इच्छा अजित दादांची' सुनील शेळकेंच वक्तव्य
मला मंत्री करण्याची इच्छा अजित दादांची ही आहे. मावळचे आमदार सुनील शेळकेंनी असं म्हणत आणखी उत्सुकता वाढवली आहे. अजित पवार गटाच्या संभाव्य मंत्री पदाच्या यादीत मावळच्या सुनील शेळकेंचं नाव आहे. भाजप, शरद पवार गट, ठाकरेंची शिवसेना, काँग्रेस, मनसे यांसह विविध संघटनांच्या मावळ पॅटर्नवर शेळके भारी पडलेत. शेळके एक लाख आठ हजारांच्या मताधिक्याने निवडून आल्यानं अजित दादा त्यांना मंत्री पदाचं बक्षीस देतील, असा विश्वास त्यांनी व्यक्त केला आहे.
माध्यमांशी बोलताना सुनील शेळके म्हणाले, ” माध्यमांमध्ये मला मंत्रिपद मिळण्याची शक्यता आहे अशा बातम्या पाहिल्या. परंतु मी अजित पवार, प्रफुल पटेल, छगन भुजबळ या पक्षातील कोणत्याही मोठ्या नेत्यांकडे माझी व्यक्तिगत इच्छा व्यक्त केलेली नाही. महायुतीमध्ये भारतीय जनता पक्ष, शिवसेना, राष्ट्रवादी काँग्रेस हे तीन पक्ष आहेत. या पक्षातील प्रमुख नेत्यांना पहिले मंत्रिमंडळामध्ये स्थान दिले जाईल.
त्यानंतर नवीन चेहऱ्यांना देखील संधी मिळणार आहे अशा पद्धतीची काही माहिती मला मिळाली आहे. मात्र, उद्याच्या काळामध्ये एखादी मोठी जबाबदारी मिळाली तर माझ्या पक्ष संघटनेकरता तालुक्याच्या विकासाकरिता अधिकच योगदान किंवा अधिक काम करण्याची माझी तयारी असणार आहे”, असे शेळके यांनी म्हंटले आहे.
राज्यात गुरूवारी मुख्यमंत्री आणि काही मंत्र्याचा शपथविधी पार पडणार आहे. अद्याप शपथ घेणाऱ्या नेत्यांची नावे गुलदस्त्यात आहेत. तर पुण्यातील मावळ विधानसभा मतदारसंघातून मावळ पॅटर्न मोडीत काढून विक्रमी मतांनी विजयी होणारे राष्ट्रवादी काँग्रेस अजित पवार पक्षाचे आमदार सुनील शेळके यांना देखील मंत्रीपद मिळण्याच्या चर्चा आता सुरू आहेत. अशातच मला मंत्री करण्याची इच्छा अजित दादांची ही आहे, असं म्हणत मावळचे आमदार सुनील शेळकेंनी आणखी उत्सुकता वाढवली आहे.
