Pratap Sarnaik Orders : ड्युटीवर दारु प्यायली तर होणार 'ही' कडक कारवाई, परिवहन मंत्र्याचे आदेश
कर्तव्यावर असताना दारू पिणाऱ्या एसटी कर्मचाऱ्यांवर आता कडक पावले उचलली जाणार आहेत. परिवहन मंत्री प्रताप सरनाईक यांनी याबाबत थेट आणि स्पष्ट निर्णय घेतला असून, मद्यपान करून ड्युटीवर येणाऱ्या चालक व कर्मचाऱ्यांना तात्काळ निलंबित करण्याचे आदेश दिले आहेत.
मुंबईतील परळ बसस्थानकाला अचानक दिलेल्या भेटीत मंत्री सरनाईक यांनी चालक-वाहकांच्या विश्रांतीगृहांची पाहणी केली. या ठिकाणी दारूच्या रिकाम्या बाटल्या आणि मद्यपान केल्याचे पुरावे आढळून आल्याने ते संतप्त झाले. प्रवाशांच्या जीवाशी खेळ करणाऱ्या अशा बेजबाबदार वर्तनाला अजिबात माफी दिली जाणार नाही, असा इशाराही त्यांनी दिला.
मंत्री सरनाईक यांनी स्पष्ट केले की, मद्यपान करून बस चालवणे म्हणजे अपघाताला आमंत्रण देणे होय. अशा कर्मचाऱ्यांवर चौकशी करून गरज पडल्यास सेवेतून काढून टाकावे. तसेच, या प्रकारांकडे दुर्लक्ष करणाऱ्या अधिकाऱ्यांवरही विभागीय चौकशी करून कठोर कारवाई केली जाईल.
यापुढे प्रत्येक चालकाची ड्युटीपूर्वी ब्रेथ ॲनालायझरद्वारे तपासणी बंधनकारक करण्यात येणार आहे. दोष आढळल्यास त्वरित निलंबनाची कारवाई होईल. प्रवाशांची सुरक्षितता आणि एसटीवरील विश्वास टिकवण्यासाठी शासन कोणतीही तडजोड करणार नाही, असा ठाम संदेश मंत्री सरनाईक यांनी दिला.
थोडक्यात
एसटी कर्मचाऱ्यांनी ड्युटीवर असताना मद्यपान करणे गंभीर मानले आहे.
परिवहन मंत्री प्रताप सरनाईक यांनी याबाबत कडक निर्णय घेतला आहे.
मद्यपान करून ड्युटीवर येणाऱ्या चालक व कर्मचाऱ्यांना तात्काळ निलंबित करण्याचे आदेश देण्यात आले आहेत.
हा निर्णय कर्मचाऱ्यांमध्ये शिस्त आणि जबाबदारी वाढवण्यासाठी घेतला गेला आहे.
