नेदरलॅंडविरुध्द भारताची फटकेबाजी; हिटमॅनच्या नावावर आणखी एक मोठा विक्रम

नवी दिल्ली : वर्ल्डकपमध्ये भारत विरुध्द नेदरलॅंड सामन्यात हिटमॅन रोहित शर्माने मोठा विक्रम केला आहे. आता तो एका कॅलेंडर वर्षात एकदिवसीय क्रिकेटमध्ये सर्वाधिक षटकार मारणारा खेळाडू बनला आहे. यामध्ये त्याने अनुभवी फलंदाज एबी डिव्हिलियर्सला मागे टाकले आहे.

दक्षिण आफ्रिकेचा माजी क्रिकेटर डिव्हिलियर्सने 2015 मध्ये एकदिवसीय सामन्यात 58 षटकार मारले होते. हा विक्रम गेल्या 7 वर्षांपासून त्याच्या नावावर होता. आता या बाबतीत रोहित शर्मा टॉपवर आला आहे. रोहित शर्माने आपल्या डावातील पहिला षटकार ठोकताच तो पहिल्या क्रमांकावर आला. नेदरलँड्सविरुद्धच्या भारतीय डावाच्या सातव्या षटकात रोहित शर्माने हा विक्रम केला. हा षटकार ९२ मीटर लांब होता.

या षटकारासह रोहितने आणखी एक खास विक्रमही केला. कर्णधार म्हणून तो विश्वचषकात सर्वाधिक षटकार मारणारा खेळाडूही ठरला. त्याच्या आधी हा विक्रम इऑन मॉर्गनच्या नावावर होता. मॉर्गनने 2019 च्या विश्वचषक स्पर्धेत 22 षटकार मारले होते.

दरम्यान, रोहित शर्माने 2023 च्या वर्ल्डकपमध्येच षटकार मारण्याचा सर्वात मोठा विक्रम आपल्या नावावर केला होता. या प्रकरणात त्याने वेस्ट इंडिजचा दिग्गज ख्रिस गेलचा पराभव केला होता. गेलने त्याच्या आंतरराष्ट्रीय कारकिर्दीत एकूण 553 षटकार ठोकले. रोहित आता गेलच्या 20 षटकारांनी आघाडीवर आहे.