अंबानी स्फोटक प्रकरणी सहाय्यक पोलीस निरीक्षक (एपीआय) सचिन वाझे यांना शनिवारी रात्री उशिरा अटक करण्यात आली. या प्रकरणाचा तपास राष्ट्रीय तपास यंत्रणा (एनआयए) करीत आहे. शनिवारी सचिन वाझे यांची प्रदीर्घ चौकशी केल्यानंतर एनआयएने त्यांना अटक केली.उद्योजक मुकेश अंबानी यांच्या अँटिलिया या घराजवळ स्फोटकांनी भरलेली स्कॉर्पिओ गाडी सापडली होती. या प्रकरणाचा तपास एनआयएकडे सोपविण्यात आला आहे. सचिन वाझे यांची जवळपास 12 तास चौकशी केल्यानंतर एनआयएने त्यांना अटक केली.

या प्रकरणावर आता राजकीय स्तरातून प्रतिक्रीया येऊ लागल्या आहेत. या कटात सहभागी असलेल्या लोकांची नावे समोर येण्यासाठी सचिन वाझे यांची नार्को टेस्ट केली जावी, अशी मागणी भाजपाचे नेते राम कदम यांनी केली आहे. भाजपाने केवळ सचिन वाझे यांना अटक करावी, इतकीच मागणी केली होती. मात्र, महाविकासआघाडी सरकारने ही मागणी मान्य केली नाही. सचिन वाझे यांच्याकडे अशी कोणती माहिती आहे की त्यामुळे सरकार आणि नेते अडचणीत येऊ शकतात? यासाठी सचिन वाझे यांनी नार्को टेस्ट झाली पाहिजे, अशी मागणी राम कदम यांन केली.यासोबतच ते म्हणाले की, सचिन वाझे यांची नार्को टेस्ट करून दूध का दूध पानी का पानी होऊ जाऊ दे. सचिन वाझे यांची नार्को टेस्ट झाली नाही तर ठाकरे सरकारचा खरा चेहरा लोकांसमोर येईल, असे राम कदम यांनी म्हटले.