Donald Trump : डोनाल्ड ट्रम्प यांची चीनला टॅरिफमधून आणखी 90 दिवसांची सूट
(Donald Trump) अमेरिकेचे राष्ट्राध्यक्ष डोनाल्ड ट्रम्प यांनी चीनला आयात शुल्कावरील कारवाईतून आणखी 90 दिवसांची स्थगिती दिली आहे. व्हाईट हाऊसच्या एका वरिष्ठ अधिकाऱ्याच्या माहितीनुसार, काही तासांपूर्वीच ट्रम्प यांनी या संदर्भातील आदेशावर स्वाक्षरी केली. या निर्णयामुळे दोन्ही देशांमधील टॅरिफवरील तणाव काही काळासाठी कमी होण्याची शक्यता आहे. ट्रम्प यांनी चीनकडून झालेल्या सहकार्याचे कौतुक करत, “आमचे राष्ट्राध्यक्ष शी जिनपिंग यांच्यासोबत चांगले संबंध आहेत, पुढे काय घडते ते पाहू,” असे वक्तव्य केले.
पूर्वी 12 ऑगस्ट 2025 पर्यंतची टॅरिफ सूट लागू होती. मुदत वाढवली नसती, तर अमेरिकेने चिनी वस्तूंवरील आयात शुल्कात 30 टक्क्यांची वाढ केली असती आणि चीननेही प्रत्युत्तरादाखल निर्यात शुल्क वाढवले असते. आता ही नवीन मुदत 10 नोव्हेंबर 2025 च्या मध्यरात्रीपर्यंत राहणार आहे.
एप्रिलमध्ये अमेरिकेने चीनवरील टॅरिफ 145 टक्क्यांपर्यंत नेले होते, ज्यावर चीनने 125 टक्के शुल्कवाढ करून प्रत्युत्तर दिले होते. त्यानंतर जूनमध्ये लंडन येथे दोन्ही देशांच्या प्रतिनिधींमध्ये चर्चा होऊन तणाव कमी करण्याचे पाऊल उचलण्यात आले. मे 2025 मध्ये, तात्पुरत्या स्वरूपात टॅरिफ कमी करण्याचा निर्णय झाला होता. मागील डेडलाइन 12 ऑगस्टच्या मध्यरात्री संपणार होती, परंतु आता वाढीव मुदतीमुळे व्यापारात तत्काळ ताण निर्माण होण्याचा धोका टळला आहे.
अमेरिका आणि चीन यांच्यातील हा टॅरिफ वाद गेल्या काही वर्षांपासून सुरू असून, ट्रिपल-डिजिट टॅरिफ पातळीमुळे दोन्ही देशांच्या व्यापारसंबंधांवर मोठा परिणाम झाला आहे.
