Satara Female Doctor case : टोकाचं पाऊल उचलण्याआधी महिला डॉक्टरने लटकवलेल्या ओढणीचा सेल्फी संशयित आरोपी प्रशांत बनकरला पाठवला?
थोडक्यात
फलटण महिला डॉक्टर प्रकरण
आत्महत्येआधी लटकवलेल्या ओढणीचा सेल्फी बनकरला पाठवला?
गोपाल बदनेचा मोबाईल पोलिसांकडून जप्त
(Satara Doctor case) सातारा जिल्ह्यातील फलटण उपजिल्हा रुग्णालयात कार्यरत असलेल्या महिला डॉक्टरच्या आत्महत्येच्या प्रकरणाने राज्यभरात खळबळ उडवली आहे. या घटनेत धक्कादायक बाब समोर आली असून, डॉक्टरने आत्महत्येपूर्वी आपल्या हातावरच मृत्यूस कारणीभूत असलेल्या दोन व्यक्तींची नावे लिहिली आहेत.
मृत डॉक्टरने आत्महत्येपूर्वी आपल्या हातावर सुसाईड नोट लिहिली होती, त्यात तिने धक्कादायक आरोप केले आहेत. त्या नोटमध्ये डॉक्टरने लिहिले आहे की, "PSI गोपाल बदने यांनी तिच्यावर पाच महिन्यांपासून वारंवार अत्याचार आणि लैंगिक शोषण केले, तसेच पोलीस अधिकारी प्रशांत बनकर यांनी तिला मानसिक छळ केला". त्या महिला डॉक्टरने या दोघांवर लैंगिक अत्याचार आणि मानसिक छळाचे गंभीर आरोप केले आहेत. याप्रकरणी दोन्ही आरोपींना अटक झाली आणि पोलीस कोठडी सुनावण्यात आली.
याच पार्श्वभूमीवर आता आणखी एक माहिती समोर येत आहे ती म्हणजे मयत डॉक्टरने आत्महत्या करण्याआधी लटकवलेल्या ओढणीचा सेल्फी संशयित आरोपी प्रशांत बनकरच्या मोबाईलवर पाठवल्याची माहिती मिळत आहे. तसेच पीएसआय गोपाल बदने याने लपवलेला मोबाईल पोलिसांनी जप्त केला असून आता या प्रकरणात तपासाला वेग येणार आहे.
