मेहरून तलाव परिसरात रेस लावलेल्या कारने घेतला 11 वर्षीचा मुलाचा बळी
मंगेश जोशी | जळगाव : जळगाव मध्ये काही तरूणांच्या मज्यामस्तीमुळे एका निष्पाप मुलाचा जीव गेल्याचा धक्कादायक प्रकार आज घडला आहे. रेस लावलेल्या कारणे 11 वर्षीय मुलाला उडवल्याचा धक्कादायक प्रकार जळगाव शहरातील मेहरुन तलाव परिसरात घडला असून या घटनेत 11 वर्षीय विक्रांत संतोष मिश्रा याचा दुर्दैवी मृत्यू झाला आहे. या घटनेमुळे परिसरात खळबळ उडाली आहे.
मेहरून तलाव परिसरात असलेल्या ट्रॅक वर दोन कारची रेस सुरू होती. त्याचवेळी आपल्या काका सोबत ट्रॅकवर सायकल चालवण्यासाठी आलेल्या 11 वर्षीय विक्रांत संतोष मिश्रा या बालकाला रेस लावलेल्या भरधाव कारने उडवले. या घटनेत बालकाचा दुर्दैवी मृत्यू झाला आहे.
हा अपघात इतका भयंकर होता की, बालक हा चेंडू सारखा वर उडून खाली पडला. तर त्याची सायकल जाऊन झाडाला अडकली. सदर घटनेनंतर बालकास तातडीने जिल्हा रुग्णालयात दाखल करण्यात आले. रुग्णालयात डॉक्टरांनी त्यास मृत घोषित केले. दरम्यान याप्रकरणी कार मधील तीन जणांना पोलिसांनी अटक केल्याची प्राथमिक माहिती समोर आली आहे.
