अंगावर चिखल उडाला म्हणून वाद; कोयत्यांनी केली वाहनांची तोडफोड

अमोल धर्माधिकारी | पुणे : अंगावर चिखल उडाला म्हणून झालेल्या वादातून दहा ते बारा जणांच्या टोळीने डोणजे येथे रात्रीच्या वेळी येऊन एक दुचाकी व एका कारची कोयत्यांनी तोडफोड केली आणि दहशत निर्माण केल्याची घटना घडली आहे. इजाज मुनीर शेख या तरुणाने याबाबत हवेली पोलीस ठाण्यात फिर्याद दिली.

त्यानुसार शिवप्रसाद उर्फ मन्या किसन चोरघे (अंदाजे वय 22 वर्ष) याच्यासह त्याच्या दहा ते बारा अज्ञात साथीदारांच्या विरोधात गुन्हा दाखल करण्यात आला आहे. सर्व आरोपी धायरी परिसरातील आहेत.

फिर्यादी इजाज हा डोणजे येथील त्याच्या घराजवळ मुख्य रस्त्याच्या कडेला थांबलेला असताना सिंहगडाकडून येणाऱ्या दुचाकीमुळे त्याच्या अंगावर चिखल उडाला. त्यातून इजाज व दुचाकीवरील तरुणांची शाब्दिक बाचाबाची व हाणामारी झाली. स्थानिकांनी मध्यस्थी करुन ही भांडणे सोडवली. दुसऱ्या दिवशी रात्री आठ वाजण्याच्या सुमारास अचानक तोंडाला रुमाल बांधून, हातात मोठमोठे कोयते घेऊन दहा ते बारा जण दुचाकींवरुन आले व मोठ्या आवाजात शिवीगाळ करत एक स्विफ्ट कार व बुलेट मोटारसायकलची तोडफोड केली.