Shrikant Shinde : उपमुख्यमंत्रीपदासाठी श्रीकांत शिंदे यांच्या नावाची चर्चा; ट्विट करत सरळ सांगितले...
महाराष्ट्राचा मुख्यमंत्री कोण होणार? याविषयी चर्चा सुरु झाली आहे. महाराष्ट्राचे मुख्यमंत्री म्हणून देवेंद्र फडणवीस यांना संधी मिळणार असल्याचे जवळपास निश्चित झाले आहे. मात्र अधिकृत घोषणा होणं बाकी आहे. यासोबतच उपमुख्यमंत्री कोण होणार यासुद्धा चर्चा रंगल्या आहेत. यातच श्रीकांत शिंदे यांना उपमुख्यमंत्री केलं जाऊ शकतं अशा चर्चा सुरु झाल्याचे पाहायला मिळत आहेत. यावर अनेक प्रतिक्रिया देखील येत आहेत.
याच पार्श्वभूमीवर आता श्रीकांत शिंदे यांनी ट्विट करत प्रतिक्रिया दिली आहे. श्रीकांत शिंदे म्हणाले की, महायुतीच्या सरकारचा शपथविधी थोडा लांबल्यामुळे सध्या चर्चा आणि अफवा यांचे पीक फोफावले आहे. काळजीवाहू मुख्यमंत्री मा. श्री एकनाथ शिंदे यांनी प्रकृती अस्वास्थ्यामुळे दोन दिवस गावी जाऊन विश्रांती घेतली. त्यामुळे अफवांना अधिकच बहर आला. मी उपमुख्यमंत्री होणार अशा बातम्या प्रश्नचिन्हे टाकून गेले दोन दिवस दिल्या जात आहेत. वस्तूतः यात कोणतेही तथ्य नसून माझ्या उपमुख्यमंत्री पदाबाबतच्या सर्व बातम्या निराधार आणि बिनबुडाच्या आहेत.
लोकसभा निवडणुकीनंतरही मला केंद्र सरकारमध्ये मंत्रिपदाची संधी होती. मात्र पक्षसंघटनेसाठी काम करण्याचा विचार करून मी तेव्हाही मंत्रिपदाला नकार दिला होता. सत्तेतल्या पदाची मला कुठलीही लालसा नाही. राज्यातील सत्तेत कोणत्याही मंत्रिपदाच्या शर्यतीत मी नाही, हे पुन्हा एकदा स्पष्ट करतो. माझा लोकसभा मतदारसंघ आणि शिवसेना या पक्षासाठीच नेटाने काम करणार आहे.
यासोबतच ते पुढे म्हणाले की, माध्यमांचा उत्साह आणि स्पर्धा आम्ही समजू शकतो, परंतु बातम्या देतांना त्यांनी वास्तवाकडे पाठ फिरवू नये अशी माझी विनंती आहे. माझ्यासंदर्भातल्या चर्चांना आता तरी पूर्णविराम मिळेल अशी माफक अपेक्षा…असे श्रीकांत शिंदे म्हणाले.
