Senior Citizen Voting: निवडणुकीत राज्य आयोगाचा अजब न्याय, ज्येष्ठ नागरिक-दिव्यांग असलेल्यांचं घरी जाऊन मतदान घेणार नाही

महाराष्ट्रातील २९ महानगरपालिकांतील २८६९ जागांसाठी उद्या (१५ जानेवारी) मतदान होणार असताना ज्येष्ठ नागरिकांसाठी घरबसल्या मतदानाची सुविधा काढून घेण्यात आली आहे. नगरपंचायत आणि नगरपरिषद निवडणुकांप्रमाणे ही सुविधा नसल्याने बहुतांश ज्येष्ठ नागरिक नाराज झाले आहेत. विधानसभा आणि लोकसभा निवडणुकांत ८५ वर्षांवरील ज्येष्ठांना घरोघरी जाऊन मतदान घेतले जात असे, पण महापालिका निवडणुकीत तसे कोणतेही आदेश राज्य निवडणूक आयोगाने जारी केलेले नाहीत. परिणामी, सर्व ज्येष्ठांना मतदान केंद्रांवर जावे लागेल.

निवडणूक कर्मचाऱ्यांच्या अभावामुळे ही सुविधा देणे शक्य नसल्याचे आयोगाने स्पष्ट केले आहे. ज्येष्ठ आणि दिव्यांग व्यक्तींना आता मतदान केंद्रावर येऊनच मतदान करावे लागेल. मात्र, केंद्रावर पोहोचल्यावर वेगळी रांग नसेल आणि गेल्याबरोबर मतदानाची सुविधा मिळेल, अशी खात्री निवडणूक अधिकाऱ्यांनी दिली आहे. विधानसभा निवडणुकांत ‘१२ डी’ अर्जाद्वारे घरोघरी जाऊन मतदान प्रक्रिया राबवली जाई, पण महापालिका, नगरपरिषद आणि नगरपंचायत निवडणुकांसाठी अशी कोणतीही प्रक्रिया पार पाडली गेली नाही.

या निर्णयामुळे ज्येष्ठ आणि दिव्यांग मतदारांमध्ये मोठी नाराजी आहे. आरोग्य समस्या आणि हालचालींमुळे मतदान केंद्रापर्यंत जाणे कठीण जाईल, असा सूर आहे. राज्य निवडणूक आयोगाने कर्मचारी टंचाईला कारणीभूत ठरवले असले तरी ज्येष्ठ संघटना आणि सामाजिक कार्यकर्ते यावर टीका करत आहेत. मतदानाचा हक्क सर्वांसाठी समान असावा, पण सुविधा उपलब्ध करून द्याव्यात, अशी मागणी होत आहे.

महापालिका निवडणुकीची तयारी अंतिम टप्प्यात असून, १७ जानेवारी रोजी निकाल जाहीर होईल. ज्येष्ठ मतदारांना प्राधान्याने मतदानाची सुविधा मिळेल, पण घरबसल्या पर्यायाचा अभाव त्यांना खटकत आहे. आयोगाने याबाबत अधिक स्पष्टता द्यावी, अशी मागणी वाढत आहे. तरीही मतदार जागरूक राहून सहभागी होतील, असा विश्वास अधिकाऱ्यांनी व्यक्त केला आहे.