Vasai-Virar Politics: वसई–विरार आणि कल्याण–डोंबिवलीत शिंदे गटाची ताकद वाढली; माजी नगराध्यक्षांसह अनेक नेत्यांचा पक्षप्रवेश

थोडक्यात बातमी वाचण्यासाठी खाली स्क्रोल करा...

राज्यात सुरू असलेल्या स्थानिक स्वराज्य संस्थांच्या निवडणुकीच्या पार्श्वभूमीवर राजकीय हालचालींना वेग आला आहे. सर्वच पक्षांकडून आपआपली घडी मजबूत करण्याचे प्रयत्न सुरू आहेत. अशातच मुख्यमंत्री एकनाथ शिंदे यांच्या नेतृत्वाखालील शिवसेनेला मोठा बूस्टर डोस मिळाला आहे. वसई–विरारमध्ये बहुजन विकास आघाडीला मोठा धक्का देत माजी नगराध्यक्ष विशाल पाटील यांनी शिवसेनेत प्रवेश केला आहे. यामुळे पालघर जिल्ह्यातील राजकीय समीकरणांमध्ये मोठा बदल घडण्याची शक्यता व्यक्त केली जात आहे.

वसई–विरारमध्ये शिंदे सेनेला मोठी वाढ

शिवसेनेच्या अधिकृत सोशल मीडिया पेजवरून दिलेल्या माहितीनुसार, मुख्यमंत्री व उपमुख्यमंत्री एकनाथ शिंदे यांच्या उपस्थितीत बहुजन विकास आघाडीचे माजी नगराध्यक्ष व माजी नगरसेवक विशाल पाटील, माजी नगरसेवक भूषण पाटील आणि त्यांच्या समर्थकांनी शिंदे शिवसेनेत जाहीर प्रवेश केला. यावेळी अमोल पाटील, तुषार पाटील या स्थानिक पदाधिकाऱ्यांनीही पक्षाचा झेंडा हाती घेतला.

एकनाथ शिंदे यांनी या सर्वांचे स्वागत करताना, आगामी निवडणुकांसाठी पक्ष अधिक बळकट होईल असा विश्वास व्यक्त केला. त्यांच्यासोबत माजी आमदार आणि पालघर संपर्कप्रमुख रवींद्र फाटकही उपस्थित होते.

कल्याण–डोंबिवलीतही पक्षप्रवेशांची मालिका

केवळ वसई–विरारच नव्हे तर कल्याण–डोंबिवली महानगरपालिकेच्या निवडणुकीआधीही शिंदे सेनेने आपले बळ वाढवले आहे. शिंदे यांच्या हस्ते माजी नगरसेवक विकास म्हात्रे, माजी नगरसेविका कविता म्हात्रे, तसेच स्थानिक नेते संदेश पाटील आणि बाळा म्हात्रे यांच्या जनसंपर्क कार्यालयाचे उद्घाटन करण्यात आले.

या कार्यक्रमात सर्वात महत्त्वाची भर पडली ती शिवसेना (ठाकरे गट)च्या महिला शहर संघटीका मंगला सुळे यांनी शिंदे सेनेत केलेल्या प्रवेशामुळे. त्यांच्या प्रवेशामुळे महिला विभागातही शिंदे गटाला बळ मिळाल्याचे पाहायला मिळाले.

निवडणूक जवळ, हालचाली वेगवान

नगरपालिका आणि नगर परिषदा निवडणुकांचे मतदान पार पडले असून निकाल २१ डिसेंबर रोजी जाहीर होणार आहेत. त्यानंतर महानगरपालिका आणि जिल्हा परिषदा निवडणूक जाहीर होण्याची शक्यता आहे. या पार्श्वभूमीवर शिंदे शिवसेनेत होत असलेली नेत्यांची भरती ही आगामी निवडणुकांसाठी मोठी रणनीती असल्याचं राजकीय विश्लेषकांचे मत आहे.

एकनाथ शिंदे यांच्या उपस्थितीत झालेल्या या प्रवेश सोहळ्यांमुळे शिंदे गटाची ताकद शहरी आणि ग्रामीण दोन्ही भागांत वाढताना दिसत आहे. पुढील काही दिवसांत अजूनही नेते पक्षांतर करण्याची शक्यता वर्तवली जात असून, राज्यातील राजकीय वातावरण अधिक तापण्याची चिन्हे आहेत.