Mumbai High Court : मतदानाच्या आधीच बिनविरोध उमेदवार निवडण्याच्या प्रकरणात हायकोर्टाचा जोरदार निर्णय

मुंबई उच्च न्यायालयाने महाराष्ट्र नवनिर्माण सेनेचे नेते अविनाश जाधव यांना मोठा धक्का दिला आहे. महाराष्ट्रातील २९ महानगरपालिका निवडणुकांसाठी येत्या १५ जानेवारीला मतदान होणार असताना, विविध महापालिकांमध्ये ६० पेक्षा अधिक नगरसेवक बिनविरोध निवडून आले आहेत. या बिनविरोध निवडीनुसार अविनाश जाधव आणि समीर गांधी यांनी मुंबई उच्च न्यायालयात याचिका दाखल केली होती. मात्र, न्यायालयाने ही याचिका फेटाळून लावली असून, याचिकाकर्त्यांच्या वकिलाला दंड ठोठावला आहे.

या प्रकरणाची सुनावणी सकाळी झाली. याचिकाकर्त्यांच्या वतीने वकील असीम सरोदे यांनी व्हिसीड्वारे युक्तिवाद केला. सुरुवातीला मेन्शन करताना त्यांनी याचिका ही आजच्या इतर सुनावणीसाठी घेण्यात आलेल्या याचिकांशी संबंधित असल्याचे सांगितले. मात्र, प्रत्यक्ष सुनावणीला प्रकरण आल्यानंतर त्यांनी 'ही याचिका निवडणुकीशी संबंधित आहे, पण आधीच्या याचिकांशी नाही', असे विधान केले. यावर न्यायमूर्तींनी तीव्र आक्षेप घेतला. 'तुम्ही कोर्टासमोर अशी चुकीची विधाने कशी करू शकता?', असा सवाल करून न्यायालयाने याचिकाकर्त्यांच्या वकिलांना चांगलेच सुनावले.

न्यायालयाने स्पष्ट केले की, 'तुम्ही चुकीची वक्तव्ये करत आहात आणि चुकीच्या मुद्द्यांवर युक्तिवाद करत आहात. त्यामुळे आम्ही तुम्हाला दंड आकारतोय आणि ही याचिका फेटाळतोय.' अविनाश जाधव आणि इतरांनी या याचिकेत निवडणूक निर्णय अधिकाऱ्यांच्या भूमिकेवर संशय व्यक्त केला होता. विशेषतः कल्याण-डोंबिवली महानगरपालिका (केडीएमसी) आणि ठाणे महानगरपालिका क्षेत्रात मोठ्या संख्येने उमेदवार बिनविरोध निवडून आले आहेत, याला आव्हान दिले होते.

असीम सरोदे यांनी युक्तिवादात म्हटले, 'आम्ही निवडणुकीला विरोध करत नाही आहोत. फक्त बिनविरोध निवड होण्याला विरोध आहे.' मात्र, न्यायालयाने हा युक्तिवाद नाकारला. उच्च न्यायालयात इतरही अशा बऱ्याच याचिका दाखल आहेत, पण त्यांना तातडीची सुनावणी मिळालेली नाही. महाराष्ट्रातील महानगरपालिका निवडणुकीत बिनविरोध निवडीनुसार झालेल्या घडामोडींमुळे राजकीय वातावरण तापले आहे. या निर्णयामुळे अविनाश जाधव यांना मोठा धक्का बसला असून, निवडणुकीची रणधर्मी अधिक तीव्र होण्याची शक्यता आहे.