Devendra Fadnavis : चेंबूर ते भक्ती पार्क दरम्यान मोनो रेल पडली बंद; मुख्यमंत्री देवेंद्र फडणवीस ट्विट करत म्हणाले...
(Devendra Fadnavis) मुंबईत सकाळपासून मुसळधार पाऊस पडत आहे. अनेक सखल भागात पाणी शिरले आहे. मुसळधार पावसामुळे लोकल सेवा ठप्प असताना आता चेंबूर ते भक्ती पार्क दरम्यान मोनोरेल बंद पडल्याचे पाहायला मिळत आहे. चेंबूर–भक्ती पार्कदरम्यान मोनोरेलला अचानक तांत्रिक बिघाड झाला. यानंतर ट्रेन थांबली आणि डब्यांतील एसी बंद झाला. ही मोनोरेल पूर्णपणे बंद असल्याने आतील व्हेंटिलेशन थांबले गोंधळ निर्माण झाला. प्रवाशांनी तात्काळ बृहन्मुंबई महानगरपालिकेच्या आपत्कालीन नंबरवर मदतीसाठी संपर्क साधला.
घटनेची माहिती मिळताच अग्निशमन दलाने घटनास्थळी धाव घेतली. बचावकार्य सुरू करण्यासाठी प्रवाशांना इमर्जन्सी दरवाज्यांपासून दूर राहण्याचे आवाहन करण्यात आले आणि त्यानंतर प्रवाशांना बाहेर काढण्याचे काम सुरु झाले. त्याचबरोबर, महानगरपालिकेचे वैद्यकीय पथक घटनास्थळी पाठवण्यात आले असल्याची माहिती मिळत आहे. मदतीसाठी क्रेन देखील घटनास्थळी दाखल झालं असून प्रवाशांना मोनोरेलमधून बाहेर काढण्यात येत आहे, अग्निशमन दलाचे जवान मदतीसाठी पोहोचले असून सर्व प्रवाशांना सुखरुप बाहेर काढण्यात येत असून तांत्रिक बिघाडामुळे ही मोनोरेल बंद पडल्याची प्राथमिक माहिती सांगितली जात आहे.
याच पार्श्वभूमीवर मुख्यमंत्री देवेंद्र फडणवीस यांनी ट्विट केलं आहे. मुख्यमंत्री देवेंद्र फडणवीस म्हणाले की, काही तांत्रिक कारणाने चेंबूर आणि भक्तीपार्क दरम्यान एक मोनोरेल अडकून पडली आहे. एमएमआरडीए, अग्निशमन दल आणि महापालिका अशा सर्वच यंत्रणा त्याठिकाणी पोहोचल्या आहेत. सर्व प्रवाशांच्या सुरक्षिततेला सर्वोच्च प्राधान्य देण्यात येत आहे.
यासोबतच ते पुढे म्हणाले की, त्यामुळे कुणीही काळजी करु नये, घाबरून जाऊ नये. सर्व प्रवाशांना सुखरुप बाहेर काढण्यात येईल. सर्वांनी संयम ठेवावा, ही माझी सर्वांना विनंती आहे. मी एमएमआरडीए आयुक्त, महापालिका आयुक्त, पोलिस आणि सर्वच यंत्रणांशी संपर्कात आहे. हा प्रकार का घडला, याचीही चौकशी करण्यात येईल. असे मुख्यमंत्री देवेंद्र फडणवीस म्हणाले.
