Guru Pushya Yoga 2025 : जाणून घ्या गुरु पुष्य योगाचे महत्त्व; मिळणार 'या' विशेष संधी

हिंदू परंपरेनुसार गुरु पुष्य योग हा अत्यंत शुभ आणि लाभदायक काळ मानला जातो. या दिवशी केलेली खरेदी, गुंतवणूक, व्यवसायाची सुरुवात, शैक्षणिक किंवा धार्मिक उपक्रम सुरू करणे अतिशय यशस्वी ठरते, असा दृढ विश्वास आहे. हा योग तेव्हा बनतो जेव्हा गुरुवार या वारास पुष्य नक्षत्राचा संयोग येतो. पुष्य नक्षत्राला नक्षत्रांमध्ये श्रेष्ठ मानले गेले आहे, तर गुरुवार हा बृहस्पती या शुभ ग्रहाचा वार असल्यामुळे ज्ञान, संपत्ती आणि समृद्धीचा कारक मानला जातो. त्यामुळे या दोघांच्या मिलनातून तयार होणारा गुरु पुष्य योग हा अत्यंत फलदायी आणि सकारात्मक मानला जातो. या विशेष संयोगाला ‘गुरुपुष्यामृत योग’ किंवा ‘गुरु पुष्य नक्षत्र योग’ असेही म्हणतात.

धार्मिकदृष्ट्या देखील या योगाला खूप महत्त्व आहे. पुष्य नक्षत्राचे स्वामी ग्रह शनी असून त्याची देवता बृहस्पती आहे. गुरुवारचा संबंध भगवान विष्णू आणि बृहस्पती या दोघांशी असल्यामुळे या दिवशी केलेली कोणतीही शुभ कृती अधिक प्रभावी मानली जाते. शास्त्रांनुसार लक्ष्मीदेवीचा जन्म याच दिवशी झाला होता, त्यामुळे संपत्ती, सौख्य, समृद्धी आणि यशासाठी हा काळ अत्यंत अनुकूल मानला जातो. या योगात घर खरेदी, वाहन खरेदी, सोनं-चांदीसारख्या मौल्यवान वस्तूंची खरेदी, नवीन व्यवसायाचा प्रारंभ, शैक्षणिक उपक्रमांची नोंदणी, दस्तऐवजांवर स्वाक्षऱ्या किंवा धार्मिक कार्य सुरू करणे विशेष शुभ ठरते.

2025 मध्ये गुरु पुष्य योग फक्त तीन वेळा येणार आहे, त्यामुळे या संधीचे महत्त्व अधिक वाढले आहे. पहिला योग 24 जुलै रोजी संध्याकाळी 4:43 पासून सुरू होऊन 25 जुलै सकाळी 5:39 वाजेपर्यंत चालेल. दुसरा योग 21 ऑगस्ट रोजी सकाळी 5:53 पासून सुरू होऊन 22 ऑगस्ट रात्री 12:08 वाजेपर्यंत असेल. तर तिसरा आणि शेवटचा योग 18 सप्टेंबर रोजी सकाळी 6:07 पासून फक्त 6:32 पर्यंत म्हणजेच केवळ 25 मिनिटांसाठी असेल. त्यामुळे या तीन योगांमध्ये योग्य नियोजन करून केलेली कृती निश्चितच फलदायी ठरेल.