Yashomati Thakur : अमरावतीत कृषिमंत्र्यांच्या दौऱ्यात काँग्रेसचा आक्रोश; यशोवती ठाकूर यांची खोडके यांच्यावर तिखट टीका

राज्याचे कृषिमंत्री यांच्या दौऱ्यादरम्यान अमरावतीत राजकीय वातावरण ढवळून निघाले. दौऱ्याला विरोध करण्यासाठी काँग्रेसने आंदोलनाचा प्रयत्न केला असता, पोलिसांनी वेळ न दवडता काँग्रेसच्या पदाधिकाऱ्यांना ताब्यात घेतले. या कारवाईदरम्यान काँग्रेस नेत्या यशोवती ठाकूर यांनी आक्रमक भूमिका घेत पोलिस आणि सत्ताधाऱ्यांवर जोरदार टीका केली.

घटनेदरम्यान घडलेल्या गोंधळात ठाकूर यांनी पोलिसांच्या कारवाईवर थेट सवाल उपस्थित केले. "इथं दिवसरात्र चोरी होतायत, गुन्हेगार मोकाट फिरतायत ते दिसत नाही तुम्हाला; पण आंदोलन करायला आलो की आम्हालाच पकडता!" असे त्यांनी संतापाने म्हटले. पोलिसांनी आंदोलन रोखण्याचा केलेला प्रयत्न हा लोकशाहीचा गळा घोटण्यासारखा असल्याचा आरोप त्यांनी नोंदवला.

यावेळी ठाकूर यांनी शिवसेना शिंदे गटाचे आमदार संजय खोडके यांच्यावरही जोरदार निशाणा साधला. अमरावती महानगरपालिका असो किंवा एपीएमसी मार्केटची जागा, सर्वत्र खोडके ‘जागा हडपण्याचा उद्योग’ सुरू असल्याचा गंभीर आरोप त्यांनी केला. "महानगरपालिकेतील जागा बळकावण्याचा प्रयत्न झाला… आता एपीएमसीची खुली जमीनही ताब्यात घेण्याचा डाव आहे. जागा कशा हस्तगत होतील आणि त्यावर व्यापार कसा करता येईल, याचाच त्यांचा विचार चालतो," असा आरोप ठाकूर यांनी करताच परिसरात खळबळ उडाली.

यशोवती ठाकूर यांच्या म्हणण्यानुसार,

"शहराची अवस्था बिकट आहे, प्रशासन ढिसाळ आहे; पण लक्ष मात्र जमिनी कशा मिळवता येतील यावर. इतकी दादागिरी अमरावतीत सुरू आहे, ते थांबवण्यासाठी आम्ही आवाज उठवतो तर त्यालाच पोलीस दडपतात," असा त्यांनी संतापाने आरोप केला. दरम्यान, पोलिसांनी काँग्रेसच्या आंदोलकांना ताब्यात घेऊन परिस्थिती नियंत्रणात आणली. परंतु या घटनेनंतर कृषिमंत्र्यांच्या दौऱ्यातील तणाव वाढला असून स्थानिक राजकारणात खोडके विरुद्ध काँग्रेस असा संघर्ष आणखी तीव्र होण्याची चिन्हे दिसत आहेत. अमरावतीत सुरू असलेल्या या राजकीय घडामोडींमुळे आगामी दिवसांत वातावरण आणखी तापण्याची शक्यता आहे.