Eknath Shinde X Account Hacked : उपमुख्यमंत्री एकनाथ शिंदे यांचे एक्स अकाउंट हॅक; पाकिस्तान-तुर्कीचे झेंडे पोस्ट करून खळबळ
महाराष्ट्राचे उपमुख्यमंत्री एकनाथ शिंदे यांचा एक्स अकाउंट रविवारी सकाळी काही काळासाठी हॅक झाल्याची घटना घडली. हॅकर्सनी त्यांच्या हँडलवरून पाकिस्तान व तुर्कीचे झेंडे दर्शविणारी पोस्ट टाकली. यामुळे काही वेळ गोंधळाचे वातावरण निर्माण झाले होते. मात्र तांत्रिक पथकाने त्वरीत हस्तक्षेप करून हँडल पुन्हा सुरळीत केले आणि सर्व संशयास्पद पोस्ट हटविण्यात आल्या.
शिंदे यांच्या कार्यालयाकडून सांगण्यात आले की, हॅकिंगची माहिती मिळताच तांत्रिक तज्ज्ञांना कामाला लावण्यात आले. अल्पावधीतच अकाउंट पुन्हा कार्यान्वित झाले असून आता ते पूर्ववत चालू आहे. या प्रकारामुळे राजकारण्यांच्या सोशल मीडिया सुरक्षेबाबत नवे प्रश्न निर्माण झाले आहेत.
भारतामध्ये गेल्या काही वर्षांत सायबर गुन्ह्यांची संख्या मोठ्या प्रमाणावर वाढली आहे. बँकिंग, दूरसंचार, आरोग्यसेवा आणि ऊर्जा क्षेत्रे ही या हल्ल्यांची मुख्य लक्ष्ये ठरत आहेत. 2024 मध्ये क्रिप्टो एक्सचेंजवर झालेला मोठा हॅक, बीएसएनएलमधील डेटा लीक आणि हेल्थ सेक्टरमधील माहिती गळती यामुळे देशाला मोठे नुकसान सहन करावे लागले. तज्ज्ञांचे मत आहे की 2025 मध्ये कृत्रिम बुद्धिमत्ता (AI) वापरून फसवणूक आणि रॅन्समवेअर हल्ले आणखी वाढण्याची शक्यता आहे.
सायबर हल्ल्यांची प्रमुख कारणे म्हणजे डिजिटल व्यवहारांचे वाढलेले प्रमाण, आर्टिफिशियल इंटेलिजन्सचा गैरवापर आणि आंतरराष्ट्रीय पातळीवरील तणाव. यामुळे नागरिकांनी जागरूक राहणे अत्यावश्यक आहे. संशयास्पद लिंकवर क्लिक न करणे, मजबूत पासवर्ड वापरणे आणि फसवणूक झाल्यास तातडीने 1930 या क्रमांकावर संपर्क करणे किंवा cybercrime.gov.in वर तक्रार नोंदवणे हा सुरक्षिततेचा मूलमंत्र मानला जात आहे.
या प्रकारच्या घटना नव्या नाहीत. यापूर्वीही अनेक राजकारण्यांचे सोशल मीडिया अकाउंट्स हॅक झाले आहेत. त्यामुळे लोकप्रतिनिधी आणि सरकारी अधिकारी यांनी आपल्या डिजिटल सुरक्षेसाठी अधिक सक्षम उपाययोजना राबवणे गरजेचे असल्याचे सायबर तज्ज्ञांचे मत आहे.
