Kalyan Dombivli Politics : कल्याण-डोंबिवलीत महापौरपदावरून भाजप-शिवसेना तणाव; सत्ता स्थापनेसाठी फोडाफोडीची चर्चा
राज्यात अनेक वर्षांपासून प्रलंबित असलेल्या महानगरपालिका निवडणुका अखेर पार पडल्या. 15 जानेवारीला मतदान झाले आणि 16 जानेवारीला निकाल जाहीर झाले. या निवडणुकांमध्ये भाजप सर्वाधिक जागा जिंकून पुढे आला असला, तरी अनेक शहरांमध्ये महाविकास आघाडीने चांगली कामगिरी केली. त्यामुळे आता महापौरपद कोणाच्या हाती जाणार, याकडे साऱ्यांचे लक्ष आहे.
कल्याण–डोंबिवली महानगरपालिकेत सध्या राजकीय हालचालींना वेग आला आहे. बहुमत असूनही भाजप आणि शिवसेना (शिंदे गट) यांच्यात महापौरपदावरून तणाव निर्माण झाला आहे. सत्ता स्थापन करण्यासाठी 62 नगरसेवकांची गरज असून भाजपकडे 50, तर शिवसेनेकडे 53 जागा आहेत. त्यामुळे दोन्ही पक्षांना इतर पक्षांच्या नगरसेवकांचा पाठिंबा हवा आहे.
या पार्श्वभूमीवर ठाकरे गट आणि मनसेचे नगरसेवक महत्त्वाचे ठरत आहेत. फोडाफोडीच्या चर्चांमुळे ठाकरे गटाचे काही नगरसेवक सुरक्षित ठिकाणी हलवण्यात आले आहेत. एकीकडे भाजप शांत भूमिका घेत असताना, दुसरीकडे शिंदे गट सक्रिय झाला आहे.
महापौरपदासाठी अडीच-अडीच वर्षांचा फॉर्म्युला पुन्हा चर्चेत येणार का, किंवा भाजप मनसेसोबत हातमिळवणी करणार का, हे पाहणे उत्सुकतेचे ठरणार आहे. कल्याण–डोंबिवलीत सत्ता कुणाच्या हाती जाणार, याची उत्सुकता शिगेला पोहोचली आहे.
