चांदणी चौक पुलाचे आज लोकार्पण होणार आहे. केंद्रीय रस्ते आणि वाहतूक मंत्री नितीन गडकरी पुलाचे उद्घाटन करणार आहेत. सकाळी ११ वाजता हा समारंभ होणार आहे. सर्वाधिक वाहतूक कोंडी होणाऱ्या चांदणी चौक परिसरात आता वाहतूक कोंडी संपणार आहे.
या कार्यक्रमासाठी राज्याचे मुख्यमंत्री एकनाथ शिंदे येणार नसल्याची माहिती मिळत आहे. त्यामुळे चर्चांना उधाण आलं आहे. गेल्या दोन दिवसांपासून अजित पवार आणि एकनाथ शिंदे यांच्यात कोल्ड वॉर सुरु असल्याची चर्चा रंगली आहे.
याच पार्श्वभूमीवर उपमुख्यमंत्री अजित पवार यांनी प्रतिक्रिया दिली आहे. अजित पवार म्हणाले की, एकनाथ शिंदे हे नाराज नाही. त्यामुळे ते नाराज असल्याच्या चर्चा कोणीही करु नये. मुख्यमंत्री एकनाथ शिंदे यांची प्रकृती काही दिवसांपासून ठीक नाही आहे. त्यामुळे आम्हीच त्यांना आरामाचा सल्ला दिला आहे. आराम करण्यासाठी ते त्यांच्या मुळगावी गेले असल्याने ते आजच्या चांदणी चौकातील पुलाच्या लोकार्पणासाठी उपस्थित राहू शकणार नाहीत. असे अजित पवार म्हणाले.
