पुण्यातील तापमानात घट, थंडीचा जोर वाढला

थोडक्यात

• पुणे शहरातील कमाल आणि किमान तापमानात घट

• थंडीचा जोर वाढला

• पुढील काही दिवस तापमानात घट होत राहणार

पुणे शहरातील कमाल आणि किमान तापमानात घट होत असल्याने थंडीचा जोर वाढल्याचे पाहायला मिळत आहे. यंदाच्या हंगामात पहिल्यांदाच दहा अंश सेल्सियसपेक्षा कमी तापमानाची नोंद झाली असून, थंडीमुळे रात्रीबरोबर दिवसाही हुडहुडी जाणवू लागली आहे.

पुढील काही दिवस तापमानात घट होत राहणार असल्याचा अंदाज हवामान तज्ज्ञांनी वर्तवला आहे. बंगालच्या उपसागरात चक्रीवादळे तयार होण्याचा अति उच्च काळ संपलेला असल्याची माहिती मिळत असून चक्रीवादळाचा काळ संपल्यामुळे हिवाळ्याला पोषक स्थिती निर्माण झाली आहे.

थंडीसाठी पोषक स्थिती निर्माण झाल्यामुळे डिसेंबर, जानेवारी आणि फेब्रुवारी महिन्याच्या अखेरपर्यंत चांगली थंडी पडण्याचा अंदाज वर्तवण्यात आला आहे.