बॅलेटवर निवडणूक घेण्याच्या अटीवर राजीनामा देण्यास तयार- उत्तम जानकर
महाराष्ट्रात महायुतीला एकहाती सत्ता मिळाल्यानंतर महाविकास आघाडीकडून ईव्हीएम मशिन आणि निवडणूक आयोगाच्या मतदान पद्धतीवर आक्षेप घेतला जाऊ लागला. सोलापूर येथील मारकडवाडी येथे बॅलेट पेपरवर अभिरूप मतदानाची मागणी ग्रामस्थांनी केली. मात्र, जमावबंदीच्या आदेशानंतर रद्द करण्यात आली. त्यानंतर महाराष्ट्रासह देशाचं लक्ष मारकडवाडीकडे वेधलं आहे. राहुल गांधी मारकडवाडीला भेट देणार आहेत. उत्तमराव जानकर यांच्या मतदारसंघ असलेल्या माळशिरसमध्ये मारकडवाडी आहे. मारकडवाडीमध्ये आपल्याला कमी मतं मिळाली असल्याचं जानकर यांचं म्हणणं आहे.
उत्तम जानकर यांनी देशात पोटनिवडणुकीसाठी बॅलेट पेपरवर निवड घेण्यास अडचण काय आहे, असा सवाल उपस्थित केला. त्यावर चंद्रशेखर बावनकुळे यांनी प्रतिक्रिया देताना मविआतील सर्व EVM वर निवडून आलेल्या नेत्यांनी राजीनामा द्यावा, असे म्हटले. बावनकुळे यांच्या मते, राजीनाम्याचे उद्योग खोटारडेपणा करण्यासाठी सुरू झाले आहेत.
राष्ट्रवादी काँग्रेस (शरदचंद्र पवार) पक्षाचे प्रदेशाध्यक्ष जयंत पाटील यांनी उत्तम जानकर यांच्या राजीनामा देण्याच्या विधानावरून सूचना दिल्या आहेत. "माझ्या परवानगीशिवाय राजीनामा देऊ नका." त्यांनी पुढे म्हटले की, राजीनामा दिला आणि परत निवडणूक झाली तरी तुम्हीच निवडून येणार, परंतु सरकारने बॅलेट पेपरवर निवडणूक घेण्यास तयार असल्याचे कबूल करावे. यावर, जयंत पाटील यांनी EVM बाबत शंका उपस्थित करणाऱ्या जनतेला उत्तर दिले, कारण मतदान करणाऱ्यांच्या मनात EVM च्या विश्वासार्हतेबाबत शंका आहे.
चंद्रशेखर बावनकुळे यांनी जयंत पाटील यांच्या टीकेला प्रत्युत्तर दिले. त्यांनी म्हटले की, विरोधकांना स्थानिक स्वराज्य निवडणुकीत पराभवाची भीती आहे, आणि म्हणूनच शरद पवार व जयंत पाटील धावपळ करत आहेत. बावनकुळे यांनी पुढे म्हटले की, "मारकडवाडीला आलेले लोक हे पवारांचे कार्यकर्ते आहेत."
दरम्यान, विधानसभेत 8 आमदारांचा शपथविधी बाकी आहे. ज्यामध्ये उत्तम जानकरांसह इतर आमदारांचा समावेश आहे. हे आमदार विधानसभा अध्यक्षांच्या दालनात शपथ घेतील. खालील 8 आमदार शपथविधीसाठी उपस्थित राहिलेले नाहीत:
उत्तमराव जानकर
विलास भुमरे
वरुण सरदेसाई
मनोज जामसुतकर
विनय कोरे
जयंत पाटील
शेखर निकम
सुनिल शेळके
यांच्या शपथविधीची प्रक्रिया सध्या बाकी आहे. जी विधानसभा अध्यक्षांच्या दालनात होईल.
