Delhi Blast : दिल्लीतील स्फोटानंतर मुंबई, नवी मुंबई, नागपूरातही सुरक्षा कडक; राज्यभरातील पोलीस हाय अलर्टवर
थोडक्यात
दिल्लीतील लाल किल्ला परिसरात स्फोट
स्फोटामुळे दुकानांच्या काचाही फुटल्या
दिल्लीतील स्फोटानंतर मुंबई, नवी मुंबई, नागपूरातही सुरक्षा कडक
(Delhi Blast ) नवी दिल्लीमध्ये लाल किल्ला मेट्रो स्टेशन गेट क्रमांक 1 जवळ पार्किंगमध्ये स्फोट झाला. या स्फोटानंतर अनेक गाड्यांना आग लागली. हा स्फोट एवढा मोठा होता की, आजूबाजूच्या दुकानांच्या काचाही फुटल्या. या स्फोटात सुमारे 8 जणांचा मृत्यू झाला असून, 20 हून अधिक लोक जखमी झाले आहेत.
जखमींना रुग्णालयात उपचारासाठी दाखल केलं आहे. लाल किल्ला परिसरात मेट्रोच्या गेट क्रमांक एकवर एक कार उभी होती. याच कारमध्ये हा स्फोट झालेला आहे. या स्फोटामुळे आजूबाजूच्या तीन गाड्यांना आग लागल्याची घटना घडली. हा स्फोट नेमका कसा झाला? याचा तपास आता घेतला जात आहे. याच पार्श्वभूमीवर आता ठिकठिकाणी सुरक्षा वाढवण्यात आली आहे. दिल्लीतील स्फोटानंतर नवी मुंबईतही सुरक्षा कडक करण्यात आली.
नवी मुंबई पोलिस संपूर्ण शहरात हाय अलर्टवर असून ठिकठिकाणी नाकाबंदी सुरू केली आहे. एपीएमसी पोलिसांनीही बाजार परिसरातील सुरक्षा वाढवली आहे.बाजारात प्रवेश करणाऱ्या सर्व लोकांची आणि वाहनांची कडक तपासणी केली जात आहे.
या सोबतच नागपूरातही आणि अनेक ठिकाणी पोलीस बंदोबस्त तैनात करण्यात आला आहे. पोलिसांनी नागरिकांना सतर्क राहण्याचे आवाहन केले असून कोणतीही संशयास्पद व्यक्ती किंवा वस्तू आढळल्यास तात्काळ पोलीस कंट्रोल रूमला कळवण्याचे आवाहन केले आहे.
