New Delhi : सर्वोच्च न्यायालयाचे ज्येष्ठ वकील सिद्धार्थ शिंदे यांचे निधन

थोडक्यात

• सर्वोच्च न्यायालयात कार्यरत असलेले ज्येष्ठ वकील सिद्धार्थ शिंदे यांचे सोमवारी (15 सप्टेंबर) अकस्मात निधन झाले.

• वयाच्या केवळ 48 व्या वर्षी त्यांनी अखेरचा श्वास घेतला.

• हृदयविकाराचा झटका हा मृत्यूचे कारण असल्याचे सांगितले जात आहे.

Senior Lawyer Siddharth Shinde Passes Away : : सर्वोच्च न्यायालयात कार्यरत असलेले ज्येष्ठ वकील सिद्धार्थ शिंदे यांचे सोमवारी (15 सप्टेंबर) अकस्मात निधन झाले. वयाच्या केवळ 48 व्या वर्षी त्यांनी अखेरचा श्वास घेतला. न्यायालयीन प्रकरणांतील गुंतागुंतीची भाषा सर्वसामान्यांना सहजपणे समजावून सांगण्याच्या त्यांच्या शैलीमुळे ते विशेष ओळखले जायचे. त्यामुळे त्यांच्या निधनाने न्यायालयीन वर्तुळात तसेच कायद्याचा अभ्यास करणाऱ्यांमध्ये मोठी हळहळ व्यक्त केली जात आहे.

मिळालेल्या माहितीनुसार, सर्वोच्च न्यायालयात काम करत असताना शिंदे यांना अचानक चक्कर आली. तातडीने त्यांना दिल्लीतील एम्स रुग्णालयात दाखल करण्यात आले. मात्र डॉक्टरांच्या प्रयत्नांनंतरही त्यांना वाचवता आले नाही. हृदयविकाराचा झटका हा मृत्यूचे कारण असल्याचे सांगितले जात आहे.

सिद्धार्थ शिंदे यांनी अनेक महत्त्वाच्या प्रकरणांवर आपली मते आणि कायदेशीर विश्लेषण सोप्या भाषेत मांडले होते. शिवसेना वाद, मराठा आरक्षण यांसारख्या गुंतागुंतीच्या विषयांवर त्यांनी दिलेले स्पष्टीकरण सर्वांना लक्षात राहिले. त्यामुळे कायद्याच्या क्षेत्रात त्यांचे योगदान महत्त्वाचे मानले जाते.

त्यांच्या पश्चात पत्नी, मुलगा आणि मुलगी असा परिवार आहे. शिंदे हे माजी केंद्रीय कृषिमंत्री अण्णासाहेब शिंदे यांचे नातू होते. त्यांच्या जाण्याने न्यायालयीन क्षेत्रात एक जाणकार आणि संवेदनशील वकील हरपल्याची भावना व्यक्त होत आहे.