Sanjay Shirsat : संभाजीनगरमध्ये भाजपच्या अहंकारामुळे शिवसेना-भाजप युती तुटली; संजय शिरसाटांची जोरदार टीका
अहिल्यानगरनंतर आता छत्रपती संभाजीनगर महानगरपालिकेतील (Chhatrapati Sambhajinagar Mahapalika Election) महायुती फुटल्याची धक्कादायक माहिती समोर आली आहे. याबाबत राज्याचे मंत्री संजय शिरसाट यांनी अधिकृतपणे घोषणा केली आहे. उपमुख्यमंत्री एकनाथ शिंदे यांच्या नेतृत्वाखालील शिवसेनेने स्वतंत्रपणे निवडणूक लढवण्याचा निर्णय मंगळवारी जाहीर केला.
संजय शिरसाट यांनी पत्रकारांशी संवादात भाजपवर जोरदार टीका केली. ते म्हणाले, “छत्रपती संभाजीनगरमध्ये शिवसेना-भाजप युती व्हावी यासाठी मुख्यमंत्री आणि उपमुख्यमंत्री दोघांनीही प्रयत्न केला. आम्ही स्थानिक पातळीवर अनेक बैठकांचा प्रयत्न केला. मात्र स्थानिक भाजप कार्यकर्ते सुरुवातीपासूनच वेगळ्या भूमिकेत होते. यामुळे युती टिकवणे कठीण झाले.”
शिरसाट यांनी स्पष्ट केले की, युतीसाठी नऊ ते दहा बैठकांचे आयोजन केले गेले, त्यात बावनकुळे यांच्यासह बैठकही झाली. एकनाथ शिंदे आणि देवेंद्र फडणवीस देखील या बैठकींमध्ये संपर्कात होते. जागा वाटपाचा प्रारंभिक निर्णय झाला तरी भाजपने त्यात काही बदल करत आपली भूमिका ठाम ठेवली. “जागा देताना त्यात मेख मारली गेली आणि शिवसेनेच्या निर्णय प्रक्रियेत अडथळे निर्माण झाले. दुसरीकडे काही उमेदवारांना अर्ज भरण्यास सांगितले जात होते. अशा प्रकारच्या अहंकारामुळे ही युती तुटली,” असे शिरसाट यांनी सांगितले.
संजय शिरसाट यांनी म्हटले की, “आमची ताकद वाढली आहे. आम्ही स्वतंत्रपणे काहीही करू शकतो. भाजपच्या अहंकारामुळे आणि त्यांच्या असंवेदनशील भूमिकेमुळे युतीच्या प्रयत्नांना यश मिळाले नाही.”
राजकीय विश्लेषकांच्या मते, संभाजीनगरमध्ये महायुती फूटल्याने निवडणुकीचे राजकीय समीकरण बदलण्याची शक्यता आहे. शिवसेना स्वतंत्रपणे लढल्याने महाविकास आघाडीवर किंवा भाजपवर परिणाम होईल की नाही, हे आगामी काळात स्पष्ट होईल. ही घटना राज्यातील महापालिका निवडणुकीच्या रणनितीत महत्त्वपूर्ण ठरणार आहे.
