Shubhanshu Shukla : शुभांशू शुक्ला अखेर पृथ्वीवर परतले ; भारताची मान गर्वाने उंचावली

भारतीय पायलट शुभांशु शुक्ला आणि अ‍ॅक्सिऑम-4 च्या इतर सदस्यांसाठी आजचा दिवस अत्यंत महत्त्वाचा ठरला आहे. नासाच्या स्पेसएक्स ड्रॅगन यानाने आज दुपारी 3 वाजता सॅन डिएगोच्या किनाऱ्याजवळील प्रशांत महासागरात यशस्वीपणे उतरणे पार पाडले. यान पृथ्वीच्या वातावरणात प्रवेश करताना क्षणिक ध्वनीस्फोटाची अनुभूतीही निर्माण झाली, असे स्पेसएक्सकडून सांगण्यात आले.

अ‍ॅक्सिऑम-4 मोहिमेचा एक भाग म्हणून शुभांशु शुक्ला यांनी अमेरिकन अंतराळवीर कमांडर पेगी व्हिटसन, तसेच मिशन स्पेशालिस्ट स्लावोस उझनान्स्की-व्हिश्निव्ह्स्की आणि टिबोर कापू यांच्यासोबत कार्य केले. त्यांनी 14 जुलै रोजी पहाटे 4:15 वाजता आंतरराष्ट्रीय अंतराळ स्थानक (ISS) सोडले होते आणि आज त्यांचा प्रवास यशस्वीरीत्या संपन्न झाला.

या यशानंतर शुभांशु शुक्ला यांचे संपूर्ण कुटुंब अत्यंत भावनिक झाले आहे. त्यांच्या आई आशा शुक्ला यांनी प्रतिक्रिया देताना सांगितले, “सुरक्षितपणे परत आल्याचे ऐकून खूप आनंद झाला. आम्ही दररोज त्यांच्या सुरक्षिततेसाठी देवाकडे प्रार्थना करत होतो. अखेर त्यांची प्रत्यक्ष भेट होणार, याचा खूप अभिमान वाटतो आहे.”