Anant Chaturdashi 2025 : बाप्पाला निरोप देताना "अनंताचा धागा" का बांधतात जाणून घ्या यामागचं महत्त्व
यंदा शनिवार, 6 सप्टेंबर 2025 रोजी अनंत चतुर्दशी साजरी होणार आहे. गणपती बाप्पाला आपण या दहा दिवसांत यश, सुख-समृद्धी, कीर्ती आणि मनोकामनांची पूर्तता व्हावी म्हणून विनंती केली असेल. आता हीच प्रार्थना पुढे नेण्यासाठी "अनंत धागा" आपल्या मनगटावर बांधा आणि भगवान विष्णूंच्या कृपेसाठी मार्ग मोकळा करा.
अनंत चतुर्दशी आणि अनंत सूत्र
अनंत चतुर्दशीला भगवान विष्णूच्या "अनंत" या अनंत रूपाची पूजा केली जाते. या दिवशी पूजा झाल्यावर 14 गाठी असलेला एक खास धागा (अनंत सूत्र) तयार केला जातो आणि तो पुरुषांनी उजव्या तर स्त्रियांनी डाव्या हातावर बांधायचा असतो. या धाग्याच्या 14 गाठी म्हणजे विष्णूच्या 14 रूपांचे किंवा 14 लोकांचे प्रतीक मानल्या जातात. हा धागा संरक्षण, शांती, समृद्धी आणि मानसिक बळ यांचा प्रतीक मानला जातो.
पौराणिक कथा काय सांगते?
पौराणिक कथेनुसार, जेव्हा पांडवांनी द्युताच्या खेळात आपले सर्वकाही गमावले, तेव्हा भगवान श्रीकृष्णांनी त्यांना अनंत चतुर्दशीचे व्रत करण्याचा सल्ला दिला. त्यांनी हे व्रत आचरणात आणल्यावर त्यांचे वैभव परत मिळाले. "अनंत" म्हणजे ज्याला ना आरंभ आहे ना अंत – आणि म्हणूनच हे व्रत दुःख, संकटं, आणि दैन्य दूर करून जीवनात सकारात्मक बदल घडवून आणते.
अनंत सूत्र बांधण्याचा विधी
जर बाजारातून तयार १४ गाठींचं अनंत सूत्र न मिळालं, तर लाल रंगाचा धागा घेऊन त्यात स्वतःच १४ गाठी माराव्यात. हा धागा भगवान विष्णूच्या मूर्तीपाशी ठेवून, "ॐ नमो भगवते वासुदेवाय" या मंत्राचा १०८ वेळा जप करावा. पूजेनंतर तो धागा मनगटावर बांधावा.
या धाग्याचे नियम आणि आचरण
एकदा हा अनंत सूत्र बांधल्यानंतर, किमान १४ दिवसांपर्यंत मांसाहार, मद्यपान आणि शारीरिक संबंध टाळण्याचा सल्ला दिला जातो. हे धर्माचरण मनाची स्थिरता, संयम, आणि ध्येयावर लक्ष केंद्रीत राहण्यासाठी केले जाते.
हा धागा केवळ पूजेचा भाग नसून, तो स्वतःवर ठेवलेला विश्वास, ध्येयपूर्तीसाठी असलेली आठवण, आणि भगवंताच्या कृपेची भावना आहे.
धागा की ऊर्जा?
काही लोक विचारतात – एका धाग्यामुळे खरंच काही बदल होतो का? पण लक्षात घ्या, हा धागा म्हणजे केवळ सूत नव्हे, तर एक ऊर्जेचा वाहक आहे. तो आपल्याला सतत प्रयत्नशील राहा, संयमी राहा, भगवंतावर श्रद्धा ठेवा हे स्मरण करून देतो. जर पांडव त्यांच्या धैर्याने आणि विश्वासाने पुन्हा वैभव मिळवू शकतात, तर आपणही स्वप्नात पाहिलेलं यश नक्की मिळवू शकतो. फक्त श्रद्धा आणि सातत्य आवश्यक आहे – आणि अनंत सूत्र हे त्याचे प्रतीक!
