IND vs NZ ODI : न्यूझीलंडविरुद्ध वनडे मालिकेत 'हे' स्टार खेळाडू बाहेर? पंतलाही संघाबाहेर बसवण्याची शक्यता
नव्या वर्षात टीम इंडियाचा पहिला आंतरराष्ट्रीय मुकाबला न्यूझीलंडविरुद्ध होणार असून, ११ जानेवारीपासून सुरू होणाऱ्या तीन सामन्यांच्या वनडे मालिकेसाठी भारतीय संघाची अद्याप घोषणा झालेली नाही. मात्र क्रिकबझच्या अहवालानुसार, स्टार गोलंदाज जसप्रीत बुमराह आणि ऑलराऊंडर हार्दिक पंड्या या दोघांनाही विश्रांती देण्यात येणार आहे. ऋषभ पंतलाही संघाबाहेर बसवण्याच्या अटकळींनंतर आता या दोन धुरंधरांना बाहेर ठेवण्याची बातमी समोर आली असून, यामुळे चाहत्यांमध्ये निराशा आहे.
या मालिकेतून दोघांना दूर ठेवण्याचे कारण म्हणजे २०२६ टी-२० विश्वचषकाची तयारी होय. हा विश्वचषक ७ फेब्रुवारीपासून सुरू होणार असून, बुमराह आणि पंड्या हे त्यासाठी टीम इंडियाचे मुख्य आधारस्तंभ ठरतील. २०२४ च्या टी-२० विश्वचषकात दक्षिण आफ्रिकेविरुद्धच्या अंतिम सामन्यात त्यांची मॅचविनिंग गोलंदाजी निर्णायक ठरली होती. वनडे मालिकेत न खेळले तरी दोघेही २१ जानेवारीपासून न्यूझीलंडविरुद्धच्या पाच टी-२० सामन्यांच्या मालिकेत पुनरागमन करतील. ही मालिका विश्वचषकासाठी महत्त्वाची तयारी ठरेल आणि दोन्ही मालिका भारतातच खेळल्या जातील.
दरम्यान, हार्दिक पंड्या वनडे टीममधून बाहेर राहिला तरी विजय हजारे ट्रॉफीमध्ये बडोद्यासाठी किमान दोन सामने खेळू शकतो. बीसीसीआयने वरिष्ठ खेळाडूंना देशांतर्गत स्पर्धांमध्ये भाग घेण्याचा आदेश दिला असला तरी बुमराहला यातून सूट मिळाली आहे. निवड समिती ३ किंवा ४ जानेवारीला ऑनलाइन बैठक घेऊन वनडे संघ जाहीर करेल. यावेळी ऋषभ पंतला संघाबाहेर बसवून इशान किशनला पुन्हा संधी देण्यात येईल असे अहवाल सांगतात. सय्यद मुश्ताक अली ट्रॉफीतील प्रभावी कामगिरीनंतर इशानची टी-२० विश्वचषकासाठी निवड झाली असून, विजय हजारे ट्रॉफीमध्ये ३४ चेंडूत शतक झळकावल्यानंतर वनडे टीममध्ये परतण्याची शक्यता आहे.
या निवडीमुळे टीम इंडियाची रचना कशी असेल आणि नवीन वर्षातील पहिल्या मालिकेत कोणत्या तरुण खेळाडूंना संधी मिळेल, याकडे क्रिकेटप्रेमींचे लक्ष लागले आहे. न्यूझीलंडविरुद्धची मालिका भारतासाठी महत्त्वाची असून, विश्वचषक तयारीसाठी हे बदल कसे परिणामकारक ठरतील, हे पाहणे रोचक असेल.
