IND vs SA T20 Series: भारत विरुद्ध दक्षिण आफ्रिका टी-20 मालिका आजपासून सुरू; गिल-पंड्या परतल्याने टीम इंडिया अधिक भक्कम

थोडक्यात बातमी वाचण्यासाठी खाली स्क्रोल करा...

भारत आणि दक्षिण आफ्रिका यांच्यातील पाच सामन्यांच्या टी-20 मालिकेला मंगळवारपासून सुरुवात होत आहे. शुबमन गिल आणि हार्दिक पंड्या यांच्या पुनरागमनामुळे भारतीय संघ अधिक बळकट झाला आहे. गिलने आफ्रिकेविरुद्धच्या कसोटी मालिकेदरम्यान लागलेल्या मानदुखीवर मात केली असून बीसीसीआयच्या सेंटर ऑफ एक्सलन्सने त्यांना पूर्णपणे फिट घोषित केले आहे. भारतीय टी-20 संघाचे नेतृत्व सूर्यकुमार यादव करत असून गिल उपकर्णधार म्हणून मैदानात उतरणार आहे.

पहिला सामना कटकच्या बाराबती स्टेडियमवर होणार असून दुसरा सामना चंदीगडच्या महाराजा यादविंद्र सिंह आंतरराष्ट्रीय स्टेडियमवर पार पडणार आहे. धर्मशाळा तिसऱ्या सामन्याचे यजमानपद सांभाळेल, तर चौथा सामना लखनऊच्या एकाना स्टेडियमवर खेळला जाईल. मालिकेचा शेवटचा पाचवा टी-20 सामना अहमदाबादच्या नरेंद्र मोदी स्टेडियममध्ये रंगणार आहे.

भारताने यापूर्वी झालेली एकदिवसीय मालिका 2-1 अशी जिंकली असली तरी कसोटी मालिकेत त्यांना 2-0 असा पराभव स्वीकारावा लागला होता. या पार्श्वभूमीवर टी-20 मालिकेत भारतीय संघ दमदार पुनरागमन करेल, अशी अपेक्षा आहे. जसप्रीत बुमराह आणि अर्जदीप सिंग भारतीय वेगवान गोलंदाजीचे नेतृत्व करणार आहेत, तर जगातील क्रमांक एक टी-20 गोलंदाज वरुण चक्रवर्ती स्पिन आक्रमणाचे प्रमुख शस्त्र ठरणार आहेत.

हार्दिक पंड्या तब्बल तीन महिन्यांनंतर भारतीय संघात पुनरागमन करत आहेत. आशिया कपनंतर झालेल्या क्वाड्रिसेप्स दुखापतीमुळे ते ऑस्ट्रेलिया दौरा चुकले होते. त्यांच्या पुनरागमनामुळे मध्यफळी आणि गोलंदाजी युनिटला मोठी ताकद मिळणार आहे.

दक्षिण आफ्रिकेच्या संघाचे नेतृत्व एडन मार्करमकडे आहे. टी-20 स्पेशालिस्ट डेव्हिड मिलर संघात असून वेगवान गोलंदाज एनरिच नॉर्किया दीड वर्षांनंतर पुन्हा प्रोटियाज टी-20 संघात परतला आहे. क्विन्टन डीकॉक, रिझा हेंड्रिक्स आणि डेवॉल्ड ब्रेविस यांसारखे दमदार फलंदाज भारतीय गोलंदाजांना आव्हान देणार आहेत.

दोन्ही संघांमध्ये आत्तापर्यंत 31 टी-20 सामने झाले आहेत. त्यापैकी भारताने 18 वेळा विजय मिळवला आहे, तर दक्षिण आफ्रिकेने 12 सामने जिंकले असून एक सामना निष्फळ ठरला आहे. विशेष म्हणजे भारताने 2024 टी-20 विश्वचषकाच्या अंतिम सामन्यात दक्षिण आफ्रिकेला पराभूत करत जेतेपद पटकावले होते.

भारत विरुद्ध दक्षिण आफ्रिका टी-20 मालिका JioHotstar वर थेट पाहता येणार असून Star Sports Network वर थेट प्रक्षेपण उपलब्ध असेल. कटकच्या सामन्यासह मालिकेतील सर्व सामने भारतीय वेळेनुसार रात्री 7 वाजता सुरू होणार आहेत. ही मालिका दोन्ही संघांसाठी 2026 टी-20 विश्वचषकाची तयारी म्हणून महत्त्वाची ठरणार आहे. भारतीय संघ दमदार पुनरागमन करतो की दक्षिण आफ्रिका आश्चर्याची भेट देते, हे पाहणे औत्सुक्याचे ठरेल.