आजकाल लहान मुलांपासून वृद्धांपर्यंत सर्वजण व्हॉट्सअॅपचा वापर करतात, मात्र अनोळखी लिंक्स किंवा ओटीपीवर क्लिक होऊन मोबाइल आणि वैयक्तिक माहिती हॅक होण्याचा धोका वाढला आहे. याच धोक्यांचा विचार करून व्हॉट्सअॅपने 'Primary Controls' नावाचे नवे फीचर आणले आहे, ज्यामुळे पालक मुलांसाठी मर्यादित आणि सुरक्षित सेकंडरी अकाउंट तयार करू शकतील. हे फीचर विशेषतः लहान मुलांच्या सुरक्षित वापरासाठी डिझाइन केले गेले आहे.
फीचर ट्रॅकर WABetaInfo च्या माहितीनुसार, पालक स्वतःच्या मुख्य व्हॉट्सअॅप अकाउंटमधूनच मुलांचे सेकंडरी अकाउंट सेटअप करू शकतील. हा पर्याय फक्त व्हॉट्सअॅपची किमान वयोमर्यादा पूर्ण न करणाऱ्या किंवा मर्यादित ऍक्सेस असलेल्यांसाठी उपलब्ध असेल. या अकाउंटमध्ये मुलांना केवळ सेव्ह केलेल्या कॉन्टॅक्ट्सशीच चॅट करता येईल, ज्यामुळे अनोळखी व्यक्तींशी संपर्काचा धोका जवळपास शून्य होईल.
सेटअप प्रक्रिया सोपी आहे. पालकांना प्रथम QR कोड स्कॅन करावा लागेल, नंतर मुलांचे अकाउंट लिंक करावे आणि ६ अंकी प्रायमरी PIN तयार करावा लागेल. या PINशिवाय कोणत्याही महत्त्वाच्या सेटिंगमध्ये बदल करता येणार नाही. सेकंडरी अकाउंटमध्ये अपडेट्स टॅब, चॅनल्स, ब्रॉडकास्ट्स आणि चॅट लॉकसारखी फीचर्स उपलब्ध नसतील, ज्यामुळे वापर नियंत्रित राहील.
महत्त्वाचे म्हणजे, मुलांच्या मेसेजेस आणि कॉल्सची पूर्ण गोपनीयता कायम राहील. एंड-टू-एंड एन्क्रिप्शनमुळे पालकांना थेट चॅट वाचता येणार नाहीत, पण नवीन कॉन्टॅक्ट जोडला गेला किंवा अकाउंटमध्ये बदल झाला तर त्याची माहिती मिळेल. हे फीचर लवकरच अॅपच्या स्टेबल व्हर्जनमध्ये उपलब्ध होईल, ज्यामुळे पालकांना मुलांच्या डिजिटल सुरक्षेवर नियंत्रण मिळेल.